अहेरी कर अधिकारी हल्ला प्रकरण : माजी जि.प. अध्यक्ष अजय कंकडालवार यांची चंद्रपूर सेंट्रल जेलमध्ये रवानगी
चामोर्शी न्यायालयाकडून न्यायालयीन कोठडी सुनावणी ; पोलिसांकडून हल्ल्यात वापरलेले लाकूड व फॉरेन्सिक पुरावे जप्त
अहेरी : अहेरी नगरपंचायतीचे कर अधिकारी वैभव पांढरे यांच्यावर झालेल्या प्राणघातक हल्ला प्रकरणातील मुख्य आरोपी तथा माजी जिल्हा परिषद अध्यक्ष अजय कंकडालवार यांना शनिवारी चामोर्शी न्यायालयात हजर करण्यात आले होते. न्यायालयातील दोन्ही बाजूंच्या प्रदीर्घ युक्तिवादानंतर न्यायालयाने कंकडालवार यांना ‘एमसीआर’ (मॅजिस्ट्रियल कस्टडी रिमांड) म्हणजेच न्यायालयीन कोठडी सुनावली आहे. या आदेशानुसार आता त्यांची रवानगी चंद्रपूर मध्यवर्ती कारागृहात (सेंट्रल जेल) केली जाणार असल्याची खात्रीशीर माहिती सूत्रांकडून मिळाली आहे. या हायप्रोफाईल आणि अत्यंत गाजलेल्या प्रकरणामुळे संपूर्ण गडचिरोली जिल्ह्यात एकच खळबळ माजली आहे.
अजय कंकडालवार यांना अटक केल्यानंतर पोलिसांनी त्यांची पोलीस कोठडी मिळवून या कालावधीत तपासाची चक्रे अत्यंत वेगाने फिरवली. पोलीस पथकाने आणि फॉरेन्सिक यंत्रणेने घटनास्थळाची बारकाईने पाहणी करून अनेक महत्त्वाचे वैज्ञानिक पुरावे गोळा केले आहेत. विशेष म्हणजे, कर अधिकाऱ्यांवर ज्या वस्तूने प्राणघातक हल्ला करण्यात आला, त्या गुन्ह्यात वापरण्यात आलेले संशयास्पद लाकूडही पोलिसांनी शोधून काढत जप्त केले आहे. आज पोलीस कोठडीची मुदत संपल्याने कंकडालवार यांना न्यायालयात हजर करण्यात आले होते, जिथे न्यायालयाने त्यांना जेलमध्ये पाठवण्याचे आदेश दिले.
अजय कंकडालवार यांची न्यायालयीन कोठडीत रवानगी झाली असली, तरी पोलीस तपास इथेच थांबलेला नाही. या गुन्ह्यात सामील असलेले इतर आरोपी अद्यापही फरार असून पोलीस त्यांचे धागेदोरे शोधण्यासाठी वेगवेगळ्या अंगाने तपास करत आहेत. फरार आरोपींना पकडण्यासाठी पोलिसांनी विशेष पथके तयार केली असून त्यांचा कसून शोध घेतला जात आहे.
अहेरीतील एका जबाबदार सरकारी अधिकाऱ्यावर लोकप्रतिनिधीशी संबंधित असलेल्या व्यक्तींकडून झालेल्या या प्राणघातक हल्ल्यामुळे शासकीय कर्मचारी आणि सर्वसामान्यांमध्ये तीव्र संताप व्यक्त होत आहे. या प्रकरणात दररोज नवनवे आणि धक्कादायक तपशील समोर येत असल्याने, पोलिसांच्या पुढील तपासाकडे, इतर आरोपींच्या अटकेकडे आणि चामोर्शी न्यायालयातील पुढील न्यायालयीन प्रक्रियेकडे संपूर्ण जिल्ह्याचे डोळे लागले आहेत.
