मोहाची दारू गाळण्यासाठी जाताना घटना
गडचिरोली : चामोर्शी तहसीलच्या आष्टी पोलिस ठाण्यांतर्गत येणाऱ्या वसंतपूर फार्म कॉम्प्लेक्सच्या जंगलात प्राण्यांच्या वन्य शिकारीसाठी टाकलेल्या विद्युत तारेच्या धक्क्याने वसंतपूर येथील युवकाचा मृत्यू झाला तर दुसरा जखमी आहे. ही घटना २३ डिसेंबरला घडली. मृत व जखमी तरुण मोहाची दारु गाळण्यासाठी जात होते, अशी माहिती समोर आली आहे.
दीपक दिलीप सरकार (२१) असे मृत युवकाचे नाव आहे. आकाश आशुतोश मिस्त्री (१७) हा गंभीर जखमी आहे. त्याच्यावर चंद्रपूरच्या जिल्हा रुग्णालयात उपचार सुरु आहेत. वसंतपूर गावातील काही अज्ञात आरोपींनी वन्य प्राण्यांची शिकार करण्यासाठी सोमवारी रात्री शेत संकुलाच्या जंगलात विद्युत तारा टाकल्या होत्या. दरम्यान, रात्री दीपक आणि आकाश हे दुचाकीवर बसून जंगलातील हातभट्टीवर मोहाची दारू पोहोचवायला जात होते. दरम्यान, शिकारीसाठी लावलेल्या विद्युत प्रवाहाला स्पर्श झाल्याने दीपकचा जागीच मृत्यू झाला. या प्रकरणी निष्काळजीपणा करून मृत्यूस कारणीभूत ठरल्याप्रकरणी अज्ञात आरोपीवर आष्टी पोलिस ठाण्यात गुन्हा नोंद करण्यात आला आहे. अद्याप पोलिसांना आरोपींपर्यंत पोहोचता आलेले नाही. तपास सुरू असल्याचे पो.नि. विशाल काळे यांनी सागितले.
