तंबाखूमुक्त जीवनशैली स्वीकारा – जिल्हा शल्य चिकित्सक डॉ. वर्षा लहाडे यांचे आवाहन, नर्सिंगच्या विद्यार्थ्यांसाठी चित्रकला व निबंध स्पर्धा
गडचिरोली : “भ्रामक आकर्षणाचा पर्दाफाश करूया; निकोटीन आणि तंबाखूच्या व्यसनाविरुद्ध लढा देऊया” या जागतिक घोषवाक्याच्या पार्श्वभूमीवर, राष्ट्रीय मौखिक आरोग्य कार्यक्रमांतर्गत जिल्हा सामान्य रुग्णालय, गडचिरोली येथे जागतिक तंबाखू विरोधी दिन अत्यंत उत्साहात साजरा करण्यात आला. तंबाखू व तंबाखूजन्य पदार्थांच्या सेवनामुळे आरोग्यावर होणाऱ्या गंभीर आणि जीवघेण्या दुष्परिणामांबाबत समाजात व्यापक जनजागृती निर्माण करण्याच्या उद्देशाने या विशेष कार्यक्रमाचे आयोजन करण्यात आले होते. या उपक्रमाला वैद्यकीय अधिकारी, आरोग्य कर्मचारी आणि भावी परिचारिका (विद्यार्थी) यांचा उत्स्फूर्त प्रतिसाद लाभला.
सदर कार्यक्रम जिल्हा सामान्य रुग्णालयाच्या जिल्हा शल्य चिकित्सक डॉ. वर्षा लहाडे यांच्या मार्गदर्शनाखाली आणि अध्यक्षतेखाली पार पडला. आपल्या अध्यक्षीय भाषणात डॉ. वर्षा लहाडे यांनी तंबाखू सेवनामुळे होणाऱ्या शारीरिक हानीवर सविस्तर प्रकाश टाकला. विशेषतः आजच्या तरुण पिढीत आणि विद्यार्थ्यांमध्ये वाढत चाललेल्या व्यसनाधीनतेच्या प्रवृत्तीबद्दल त्यांनी तीव्र चिंता व्यक्त केली. “तंबाखूचे सेवन केवळ मौखिक आरोग्यासाठीच (तोंड) नव्हे तर संपूर्ण शरीरासाठी घातक असून, ते कर्करोग (कॅन्सर), हृदयरोग आणि श्वसनविकारांसारख्या गंभीर आजारांना निमंत्रण देते. त्यामुळे सुदृढ आरोग्यासाठी सर्वांनी तंबाखूमुक्त जीवनशैलीचा स्वीकार करावा,” असे आवाहन त्यांनी केले.
याप्रसंगी अतिरिक्त जिल्हा शल्य चिकित्सक डॉ. छाया उईके, वैद्यकीय अधिकारी डॉ. बागराज धूर्वे, भिषक तज्ज्ञ डॉ. इंद्रजीत नगदेवते, डॉ. मनीष मेश्राम, दंत शल्यचिकित्सक डॉ. चंद्रशेखर शानगोंडा, जिल्हा सल्लागार डॉ. प्रेरणा राऊत, डॉ. मृणाली रामटेके आणि मेट्रन श्रीमती फेबूलवार प्रामुख्याने उपस्थित होते.
कार्यक्रमाच्या सुरुवातीला जिल्हा सल्लागार डॉ. प्रेरणा राऊत यांनी प्रास्ताविकेतून कार्यक्रमाची रूपरेषा मांडली. तंबाखूमुक्त समाजाच्या निर्मितीसाठी केवळ एक दिवस नव्हे, तर वर्षातील प्रत्येक दिवस हा तंबाखू विरोधी दिन म्हणून पाळला गेला पाहिजे आणि ही मोहीम निरंतर चालली पाहिजे, असे त्यांनी सांगितले.
त्यानंतर दंत शल्यचिकित्सक डॉ. चंद्रशेखर शानगोंडा यांनी मौखिक आरोग्याचे महत्त्व पटवून दिले. “तंबाखूच्या नियमित वापरामुळे तोंडाचा कर्करोग आणि हिरड्यांचे गंभीर आजार होतात. तोंडात पांढरे किंवा लाल चट्टे पडणे, दीर्घकाळ जखमा असणे अथवा तोंड उघडण्यास त्रास होणे अशी लक्षणे दिसल्यास त्वरित डॉक्टरांकडून मौखिक तपासणी करून घ्यावी,” असा सल्ला त्यांनी दिला.
या दिनाचे औचित्य साधून शासकीय नर्सिंग विद्यालय, गडचिरोली येथील विद्यार्थ्यांसाठी तंबाखू विरोधी चित्रकला आणि निबंध स्पर्धांचे आयोजन करण्यात आले होते. विद्यार्थ्यांनी आपल्या कला आणि लेखणीच्या माध्यमातून व्यसनाधीनतेचे भयानक वास्तव प्रभावीपणे मांडले. स्पर्धेतील विजेते चित्रकला स्पर्धा: हरिशकुमार कोठावार (प्रथम), तेजस्विनी वासनिक (द्वितीय), अलपेशा खेवले (तृतीय). निबंध स्पर्धा: हरिशकुमार कोठावार (प्रथम), तोशिना नाकडे (द्वितीय), तेजस्विनी वासनिक (तृतीय). सर्व विजेत्या विद्यार्थ्यांना उपस्थित मान्यवरांच्या हस्ते आकर्षक ट्रॉफी व अधिकृत प्रमाणपत्रे प्रदान करून सन्मानित करण्यात आले.
या संपूर्ण प्रबोधनपर कार्यक्रमाचे नेटके सूत्रसंचालन करून आभार राहुल कंकनालवार यांनी मानले. हा कार्यक्रम यशस्वी करण्यासाठी मीना दिवटे, राहुल चावरे, वैशाली बोबाटे, स्टाफ नर्स शिल्पा सरकार, भूपेश दरडमारे तसेच नर्सिंग विद्यालयाच्या विद्यार्थिनींनी व कर्मचाऱ्यांनी विशेष परिश्रम घेतले.
