आदिवासी संस्कृतीची जपणूक आणि लोककल्याणासाठी घातले साकडे ; भाविकांची मोठी उपस्थिती
एटापल्ली : सुरजागड येथील आदिवासी समाजाचे आराध्य दैवत असलेल्या ठाकूर देवाच्या चरणी माजी राज्यमंत्री राजे अम्ब्रीशराव आत्राम यांनी लीन होऊन दर्शन घेतले. पारंपरिक धार्मिक विधी आणि आदिवासी रीतीरिवाजांनुसार पार पडलेल्या या पूजनाने संपूर्ण सुरजागड परिसरात भक्तिमय वातावरण निर्माण झाले होते.
सुरजागड हा परिसर केवळ खनिजांसाठीच नाही, तर तिथल्या समृद्ध आदिवासी संस्कृती आणि परंपरेसाठी विशेष ओळखला जातो. ठाकूर देवावर येथील नागरिकांची अढळ श्रद्धा आहे. राजे अम्ब्रीशराव आत्राम यांनी या ठिकाणी स्थानिक पुजारी आणि आदिवासी बांधवांच्या उपस्थितीत देवाला नारळ व फुले अर्पण करून विधिवत पूजा केली. यावेळी त्यांनी परिसरातील जनतेच्या सुख-समृद्धी, शांती आणि सर्वांगीण विकासासाठी प्रार्थना केली.
दर्शन घेतल्यानंतर आत्राम यांनी उपस्थित स्थानिक नागरिकांशी जिव्हाळ्याचा संवाद साधला. आदिवासी समाजाच्या विविध प्रश्नांवर चर्चा करताना ते म्हणाले की, “आपल्या पूर्वजांनी जपलेली ही संस्कृती आणि परंपरा आपली खरी ओळख आहे. सुरजागड परिसराचा विकास होताना तो पर्यावरणपूरक असावा आणि त्यातून स्थानिकांचे हित जोपासले जावे, यासाठी आपण प्रयत्नशील राहिले पाहिजे.”
याप्रसंगी सुरजागडच्या ग्रामसभा इलाखा अध्यक्ष कल्पना आलाम यांच्यासह राजू पुंगाटी, अनिल कुर्लीवार, शामराव दोरपेटी, मोहन नामेवार, मंगू दोरपेटी, रेन्द्र येमला, राजू मुडमा, प्रशांतभाऊ आत्राम, बाबला मुजुमदार, प्रसाद पुल्लूरवार, येवलं पुलके, संपत पेंडाकुलवार, अनिकेत मामीडवार, अविष्कार गड्डामवार आणि तालुक्यातील विविध इलाखा प्रमुख मोठ्या संख्येने उपस्थित होते.
एटापल्ली तालुक्यातील या दौऱ्यामुळे स्थानिक आदिवासी बांधवांमध्ये आनंदाचे वातावरण होते. राजघराण्यातील वारसदार म्हणून महाराजांनी जपलेली ही परंपरा पाहून अनेकांनी समाधान व्यक्त केले. पूजेनंतर उपस्थित भाविकांना प्रसादाचे वाटप करण्यात आले.
