‘पलाश मिनी सरस’ प्रदर्शनीला भेट ; उत्पादनांच्या दर्जासह पॅकेजिंग सुधारण्याच्या दिल्या महत्त्वपूर्ण सूचना
गोंदिया : “ग्रामीण भागातील महिला बचत गटांमध्ये अफाट कौशल्य आहे. त्यांनी तयार केलेल्या उत्पादनांना मोठ्या बाजारपेठेत स्थान मिळवून देण्यासाठी आता केवळ निर्मितीवर अवलंबून न राहता ‘विपणन’ (Marketing) आणि प्रभावी ‘पॅकेजिंग’वर लक्ष केंद्रित करणे काळाची गरज आहे,” असे प्रतिपादन आमदार विनोद अग्रवाल यांनी केले.
गोंदिया येथील इंदिरा गांधी स्टेडियमवर आयोजित ‘पलाश मिनी सरस’ प्रदर्शनीला शुक्रवारी आमदार अग्रवाल यांनी सदिच्छा भेट दिली, त्यावेळी ते बोलत होते. महाराष्ट्र राज्य ग्रामीण जीवनोन्नती अभियान (उमेद) अंतर्गत १७ ते २१ फेब्रुवारी दरम्यान या भव्य प्रदर्शनाचे आयोजन करण्यात आले आहे.
आमदार विनोद अग्रवाल यांनी प्रदर्शनीतील प्रत्येक स्टॉलला वैयक्तिकरित्या भेट दिली. ग्रामीण महिलांनी आपल्या हातांनी तयार केलेल्या हस्तकला, घरगुती मसाले, सेंद्रिय तांदूळ आणि इतर कलाकुसरीच्या वस्तूंची त्यांनी बारकाईने पाहणी केली. महिलांच्या या कष्टाचे कौतुक करतानाच, ही उत्पादने ग्राहकांना अधिक आकर्षक कशी वाटतील, याबद्दल त्यांनी उपयुक्त तांत्रिक सूचनाही केल्या.
याप्रसंगी मार्गदर्शन करताना ते म्हणाले की, “आजच्या स्पर्धात्मक युगात वस्तूच्या गुणवत्तेसोबतच तिचे सादरीकरण महत्त्वाचे ठरते. बचत गटांनी आपल्या वस्तूंचे पॅकेजिंग आधुनिक पद्धतीने केल्यास आणि योग्य मार्केटिंग तंत्राचा वापर केल्यास, गोंदियातील ही उत्पादने केवळ जिल्ह्यातच नव्हे, तर देशाच्या कानाकोपऱ्यात पोहोचू शकतील.”
यावेळी पंचायत समिती सभापती मुनेश रहांगडाले, जिल्हा ग्रामीण विकास यंत्रणेच्या प्रकल्प संचालक प्रमिला जाखलेकर, जिल्हा अभियान व्यवस्थापक नरेंद्र रहांगडाले यांच्यासह विविध विभागांचे पदाधिकारी आणि नागरिक मोठ्या संख्येने उपस्थित होते. लोकप्रतिनिधींच्या या भेटीमुळे बचत गटातील महिलांमध्ये उत्साहाचे वातावरण निर्माण झाले असून, त्यांना नवी उभारी मिळाली आहे.
