गडचिरोली : आंघोळीसाठी बाथरूममध्ये पाणी गरम करायला गेलेल्या एका २५ वर्षीय तरुणाचा इलेक्ट्रिक हिटरचा जोरदार शॉक लागून मृत्यू झाल्याची एक अत्यंत हृदयद्रावक घटना शहरात घडली. जयंत मनोहर भांडेकर असे या मृत तरुणाचे नाव असून, तो शहरातील एक उदयोन्मुख व्यावसायिक होता. या घटनेमुळे संपूर्ण गडचिरोली शहरात शोककळा पसरली असून हळहळ व्यक्त केली जात आहे.
मिळालेल्या माहितीनुसार, जयंत भांडेकर हे शहरातील प्रसिद्ध ‘जयंत आटा चक्की’चे संचालक म्हणून सर्वांच्या परिचयाचे होते. शुक्रवारी दिवसभराचे व्यावसायिक काम आटोपून ते रात्री घरी परतले होते. आंघोळीसाठी ते बाथरूममध्ये गेले असता, तेथे पाणी गरम करण्यासाठी लावलेल्या इलेक्ट्रिक हिटरमध्ये अचानक विद्युत प्रवाह (करंट) उतरला. पाण्याचा स्पर्श होताच जयंत यांना विजेचा भीषण झटका बसला आणि ते बाथरूममध्येच कोसळले.
बराच वेळ होऊनही जयंत बाथरूममधून बाहेर न आल्याने कुटुंबीयांना संशय आला. त्यांनी वारंवार आवाज दिला, मात्र आतून कोणताही प्रतिसाद न मिळाल्याने दरवाजा उघडून पाहिले असता जयंत निपचित पडलेले आढळले. त्यांना तातडीने जिल्हा सामान्य रुग्णालयात हलवण्यात आले, मात्र तपासणीअंती वैद्यकीय अधिकाऱ्यांनी त्यांना मृत घोषित केले. जयंत भांडेकर हे त्यांच्या साध्या, कष्टकरी आणि हसतमुख स्वभावामुळे परिसरात अत्यंत लोकप्रिय होते. आपल्या व्यवसायातून त्यांनी अल्पावधीतच मोठी ओळख निर्माण केली होती. त्यांच्या अशा आकस्मिक निधनाने भांडेकर कुटुंबावर दुःखाचा डोंगर कोसळला आहे.
उन्हाळा किंवा पावसाळ्यात इलेक्ट्रिक हिटर वापरताना विशेष काळजी घेणे आवश्यक आहे. हिटर सुरू असताना बादलीतील पाण्याला स्पर्श करणे किंवा हिटर सुरू ठेवून बाथरूममध्ये जाणे जीवघेणे ठरू शकते. अशा उपकरणांचा वापर करताना ‘अर्थिंग’ आणि वायरची सुरक्षितता तपासणे गरजेचे आहे.
