आरमोरी : संस्कृतीचे वैभव आणि सामूहिक उत्साहाचा संगम साधत आरमोरी येथे श्रीकृष्ण दहीहंडी आयोजन समितीच्या वतीने भव्य दहीहंडी उत्सवाचे आयोजन करण्यात आले होते. हितकारणी विद्यालयाच्या पटांगणावर झालेल्या या सोहळ्यात हजारो भाविकांनी हजेरी लावली आणि कार्यक्रमाला मोठी शोभा आली.
यंदाच्या उत्सवात पारंपरिक, ऑलिंपिक आणि महिला गटाच्या दहीहंडी स्पर्धांनी सर्वांचे लक्ष वेधले. गावोगावच्या पथकांनी या स्पर्धांमध्ये उत्साहाने भाग घेतला. पारंपरिक दहीहंडी या स्पर्धेत जे एमडी बोरगाव या संघाने विजेतेपद पटकावले आणि त्यांना रु. २१,००१ चे पारितोषिक देण्यात आले. ऑलिंपिक मॅरेथॉन दहीहंडी या स्पर्धेत हितकारणी बॉईज, आरमोरी आणि एसआरपीएफ जवान, विसोरा यांना संयुक्त विजेते घोषित करून प्रत्येकी रु. ११,००१ चे बक्षीस देण्यात आले. शिवकन्या टीम, आरमोरी यांनी महिला गटातील ऑलिंपिक दहीहंडी जिंकून रु. ५,००१ चे पारितोषिक मिळवले. तसेच, शिवशाही महिला टीमनेही उत्साहवर्धक सहभाग नोंदवत रु. ५,००१ चे बक्षीस मिळवले.
उत्सवात श्रीकृष्ण-राधा वेशभूषा स्पर्धेचे आयोजन करण्यात आले होते. यात मुलांनी पारंपरिक वेशभूषेत मनमोहक सादरीकरण करून प्रेक्षकांची मने जिंकली. कृष्ण वेशभूषेत दुर्वास करकाडे आणि राधा वेशभूषेत सिद्धी ठाकरे यांनी प्रथम क्रमांक पटकावला आणि प्रत्येकी रु. १,५०० रोख रक्कम व ट्रॉफी जिंकली.
कार्यक्रमाचे उद्घाटन सहकार महर्षी प्रकाश सावकार पोरेड्डीवार यांच्या हस्ते, तर अध्यक्षस्थानी माजी आमदार कृष्णा गजबे होते. उद्‌घाटनप्रसंगी बोलताना पोरेड्डीवार म्हणाले, “दहीहंडी ही केवळ एक स्पर्धा नसून, ती आपल्या संस्कृतीतील ऐक्य, शिस्त आणि संघभावना दर्शवते. तरुणाईने ही मूल्ये आत्मसात करावीत.”
माजी आमदार कृष्णा गजबे यांनी श्रीकृष्ण हे तरुण पिढीसाठी आदर्श असल्याचे सांगत, समाजात सद्भाव आणि आनंद जपण्याची गरज व्यक्त केली.
या सोहळ्याला जिल्हा महामंत्री सदानंद कुथे, जिल्हा उपाध्यक्ष नंदू पेट्टेवार, जिल्हा सचिव तथा माजी नगरसेवक भारत भावनथडे, जिल्हा सचिव पवन नारनवरे, तालुका अध्यक्ष पंकज खरवडे, शहर अध्यक्ष विलास पारधी, श्रीहरी कोपुलवार, तेजराव बोरकर, चकनाक पवार, माणिक भोयर, गंगाधर जुवारे, बी.टी. सेलोकर, खेमराज जांबुळे व इतर प्रमुख मान्यवर उपस्थित होते. संपूर्ण कार्यक्रमाचे नियोजन आयोजन समितीच्या कार्यकर्त्यांनी उत्कृष्टपणे केले, ज्यामुळे हा उत्सव यशस्वी झाला.
