मते कुटुंबावर कोसळला दुःखाचा डोंगर; एकाचवेळी निघाली आजोबा-नातवाची अंत्ययात्रा; उपस्थितांचे डोळे पाणावले
भंडारा : रक्ताच्या नात्याची वीण किती घट्ट असते आणि जिवापाड केलेल्या प्रेमाचा विरह किती वेदनादायी असू शकतो, याचा काळीज पिळवटून टाकणारा आणि हृदय हेलावणारा प्रसंग मोहाडी तालुक्यातील पालोरा येथे बुधवारी (दि. २९ जुलै) घडला. अवघ्या ४० वर्षांच्या नातवाच्या अकस्मात निधनाची बातमी ऐकताच ७९ वर्षांच्या आजोबांना तीव्र हृदयविकाराचा झटका आला आणि त्यातच त्यांचीही प्राणज्योत मालवली. नितीन रमेश मते (वय ४०) व रामचंद्र महादेव मते (वय ७९) अशी मृत नातू व आजोबांची नावे आहेत. एकाच घरातून आजोबा आणि नातवाची एकाच वेळी अंत्ययात्रा निघाल्याने संपूर्ण पालोरा गाव शोकसागरात बुडाले.
मिळालेल्या माहितीनुसार, पालोरा येथील रहिवासी नितीन मते यांचे बुधवारी सकाळी निधन झाले. ऐन उमेदीच्या वयात नितीनचे निधन झाल्याने मते कुटुंबावर दुःखाचा डोंगर कोसळला. मात्र, आपल्या नातवावर जिवापाड प्रेम करणाऱ्या ७९ वर्षीय आजोबा रामचंद्र मते यांना नातवाच्या निधनाची ही बातमी सहनच झाली नाही. बातमी समजताच काही वेळातच त्यांना तीव्र हृदयविकाराचा झटका आला अन् त्यांनीही अखेरचा श्वास घेतला. एकाच दिवशी कुटुंबातील दोन छत्र हरवल्याने संपूर्ण परिसरात अत्यंत हळहळ व्यक्त केली जात आहे.
बुधवारी सायंकाळी पालोरा येथील वैकुंठधामात (स्मशानभूमीत) आजोबा रामचंद्र मते आणि नातू नितीन मते यांच्यावर एकाच वेळी अत्यंत शोकाकुल वातावरणात अंत्यसंस्कार करण्यात आले. एकाच वेळी पेटलेल्या दोन चिता आणि ते काळीज पिळवटून टाकणारे दृश्य पाहून उपस्थितांच्या डोळ्यांतून अश्रूंचा अनावर पूर वाहू लागला. या दुहेरी आघातातून सावरण्यासाठी लोकप्रतिनिधी, स्थानिक पदाधिकारी, नातेवाईक आणि ग्रामस्थ मोठ्या संख्येने मते कुटुंबाच्या पाठीशी उभे राहिले होते. गावातील नागरिकांनी हा प्रसंग मते कुटुंबाच्या आयुष्यातील सर्वांत वेदनादायी आणि दुर्दैवी क्षण असल्याची भावना व्यक्त केली आहे.
