सिरोंचा, मुलचेरा आणि चामोर्शी तालुक्यातील ४८ गावांना मिळणार वरदान ; ९,५७३ हेक्टर शेती ओलिताखाली येणार
गडचिरोली : जिल्ह्यातील पाण्याअभावी त्रस्त असलेल्या आणि अनेक वर्षांपासून सिंचन सुविधांपासून वंचित राहिलेल्या शेतकरी बांधवांच्या जीवनात आता समृद्धीचा नवा अध्याय सुरू होणार आहे. राज्याचे मुख्यमंत्री तथा गडचिरोलीचे पालकमंत्री देवेंद्र फडणवीस यांच्या नेतृत्वाखालील राज्य शासनाने जिल्ह्यातील शेती क्षेत्राच्या सर्वांगीण विकासासाठी एक अत्यंत ऐतिहासिक निर्णय घेत चार मोठ्या ‘उपसा सिंचन योजनां’ना ७२२.९५ कोटी रुपयांची प्रशासकीय मंजुरी दिली आहे. यामुळे जिल्ह्यातील हजारो शेतकरी कुटुंबांना मोठा दिलासा मिळणार असून, ग्रामीण अर्थव्यवस्थेला एक नवी उभारी मिळणार आहे.
माजी खासदार तथा भाजपचे राष्ट्रीय महामंत्री डॉ. अशोक नेते यांनी गडचिरोली येथील आपल्या जनसंपर्क कार्यालयात आयोजित पत्रकार परिषदेत ही माहिती दिली. या पत्रकार परिषदेला भाजप जिल्हाध्यक्ष रमेश बारसागडे, बाबुराव कोहळे, रमेश भुरसे, डॉ. प्रणय खुणे, अरुण हरडे, प्रमोद पिपरे, नगरपरिषद बांधकाम सभापती अनिल कुनघाडकर, सदानंदजी कुथे, गोवर्धन चव्हाण, डॉ. भारत खटी, सुधाकर पेटकर यांच्यासह मोठ्या संख्येने भाजपचे पदाधिकारी व कार्यकर्ते उपस्थित होते.
गडचिरोली हा दुर्गम आणि आदिवासीबहुल जिल्हा असल्याने सिंचनाच्या सोयींअभावी येथील शेतकऱ्यांना शेतीसाठी पावसावरच अवलंबून राहावे लागत होते. शेतकऱ्यांची ही व्यथा ओळखून डॉ. अशोक नेते यांनी १८ मे २०२६ रोजी मुख्यमंत्री कार्यालय आणि जलसंपदा विभागाकडे सविस्तर निवेदन देऊन सातत्याने पाठपुरावा केला होता. त्यांच्या या अथक प्रयत्नांची दखल घेत राज्य शासनाने तातडीने कार्यवाही केली आहे.
मंजूर झालेल्या या चारही प्रकल्पांमुळे जिल्ह्यातील ३ तालुक्यांमधील एकूण ४८ गावे सिंचनाखाली येणार आहेत.
| उपसा सिंचन योजनेचे नाव | तालुका | लाभार्थी गावांची संख्या |
| रंगायपल्ली उपसा सिंचन योजना | सिरोंचा | १४ गावे |
| रमेशगुडम उपसा सिंचन योजना | सिरोंचा | ५ गावे |
| शांतीग्राम उपसा सिंचन योजना | मुलचेरा | १५ गावे |
| राजीव-चिंचोड उपसा सिंचन योजना | चामोर्शी | १४ गावे |
| एकूण | — | ४८ गावे |
या प्रकल्पांमुळे तब्बल ९,५७३ हेक्टर शेती क्षेत्र सिंचनाखाली येणार असून, शेतकऱ्यांच्या उत्पादनात मोठी वाढ होण्यास मदत होणार आहे.
यावेळी बोलताना डॉ. अशोक नेते म्हणाले की, “मुख्यमंत्री देवेंद्र फडणवीस यांनी गडचिरोलीतील शेतकऱ्यांच्या समस्यांची गंभीर दखल घेऊन तातडीने सकारात्मक निर्णय घेतला आहे. या निर्णयामुळे जिल्ह्यातील सिंचनाचा अनुशेष भरून काढण्यास मदत होईल. शेतकऱ्यांच्या प्रगतीसाठी माझे प्रयत्न भविष्यातही अविरत सुरू राहतील.”
गडचिरोलीच्या कृषी विकासात सिंचनाचा विस्तार घडवून आणणारा हा निर्णय जिल्ह्याच्या प्रगतीचा एक ‘मैलचा दगड’ ठरणार असल्याचे मत यावेळी व्यक्त करण्यात आले.
