क्रीडा आणि संस्कृतीचा अनोखा संगम ; विद्यार्थ्यांच्या सर्वांगीण विकासाला मिळाली नवी दिशा
एटापल्ली : जिल्हा परिषद उच्च प्राथमिक शाळा, गट्टा येथे नुकताच आयोजित करण्यात आलेला केंद्रस्तरीय बाल क्रीडा, कला व सांस्कृतिक महोत्सव अत्यंत भव्य, अनुशासित आणि उत्साहपूर्ण वातावरणात यशस्वीरित्या पार पडला. परिसरातील विद्यार्थ्यांची उत्सुकता, पालकांचे प्रोत्साहन, शिक्षकांचा उत्साह आणि गावकऱ्यांचा सक्रिय सहभाग यामुळे या महोत्सवाला विशेष रंगत आली. मुलांनी क्रीडा प्रात्यक्षिके, सांस्कृतिक नृत्य-गीत, कला उपक्रम आणि पारंपरिक खेळांमध्ये आपली अपूर्व प्रतिभा सादर केली.
क्रीडा कार्यक्रमाचे उद्घाटन माजी पंचायत समिती सदस्य शिला गोटा यांच्या हस्ते झाले. त्यांनी ग्रामीण भागातील मुलांमध्ये वाढत असलेल्या क्रीडा-संस्कृतीच्या जडणघडणाचे कौतुक करून, विद्यार्थ्यांनी जीवनात क्रीडेसोबत संस्कृतीची सांगड घालून पुढे जाण्याचा संदेश दिला. सांस्कृतिक कार्यक्रमाचे उद्घाटन माजी पंचायत समिती सभापती हर्षवर्धनबाबा आत्राम आणि बेबी लेकामी यांच्या हस्ते झाले. त्यांनी विद्यार्थ्यांच्या कलागुणांना उत्तेजन देत कला आणि संस्कृती ही गावची खरी ताकद असल्याचे मत व्यक्त केले.
दिवसभर चाललेल्या धावणे, खो-खो, कबड्डी, विविध कला-स्पर्धा, समूह नृत्य, गायन, भाषण आणि पारंपरिक सांस्कृतिक कार्यक्रम अशा असंख्य स्पर्धांमध्ये विद्यार्थ्यांनी आपला ठसा उमटवला. उत्कृष्ट शिस्त, समन्वय आणि कलाकुसरीच्या बळावर जिल्हा परिषद उच्च प्राथमिक शाळा, गट्टा ने चॅम्पियनशिप (चषक) मिळवत सर्वांचे लक्ष वेधले आणि संपूर्ण केंद्राचा अभिमान वाढवला.
मुख्य आकर्षण ठरलेल्या बक्षीस वितरण समारंभात सैनु गोटा (संचालक – आदिवासी विविध सहकारी महामंडळ, नाशिक) यांच्या हस्ते विजेत्या विद्यार्थ्यांचा गौरव करत त्यांच्या मेहनतीचे कौतुक करण्यात आले. तसेच गोविंद शाह (अध्यक्ष – शाळा व्यवस्थापन समिती) यांच्या हस्तेही पुरस्कार प्रदान करण्यात आले.
या संपूर्ण कार्यक्रमाचे नेतृत्व केंद्र प्रमुख एम. सी. बेडके यांनी अत्यंत शिस्तबद्ध आणि नियोजनबद्ध पद्धतीने केले. कार्यक्रमाचे प्रभावी संचालन सी. डी. लांजेवार यांनी केले, तर संपूर्ण आयोजनाची धुरा पंतनीत सातपुते यांनी समर्थपणे पेलली. गर्देवाडा गावातील नागरिक, पालक आणि स्वयंसेवकांचे सहकार्य या आयोजनासाठी उल्लेखनीय ठरले. हा महोत्सव विद्यार्थ्यांच्या क्रीडा व सांस्कृतिक क्षितिजाचा दिशादर्शक ठरला, अशी भावना व्यक्त करून कार्यक्रमाची यशस्वी सांगता झाली.
