मुंबई : मुंबईत व्यवसायानं चार्टर्ड अकाउंटेंट व प्रसिद्ध इंस्टाग्राम इन्फ्लुएन्सर असलेल्या तरुणीला रील बनवणे जीवावर बेतलं. 300 फूट खोल दरीत पडून तरुणीचा मृत्यू झाला. रायगड जिल्ह्यातील माणगावमधील कुंभे धबधब्यावर ही धक्कादायक घटना घडली. अन्वी कामदार (वय 27 वर्षे) रा. माटुंगा (मुंबई) असे मृत तरुणीचं नाव आहे. अन्वीचा मृतदेह खोल दरीतून बाहेर काढण्यात आला आहे.
मिळालेल्या माहितीनुसार, अन्वी कामदार ही तिच्या मित्र-मैत्रिणींसोबत मंगळवारी (16 जुलै) कुंभे येथील कड्यावर इंस्टाग्राम रिल्स बनवण्यासाठी आली होती. रिल बनवण्यासाठी अन्वी कुंभे येथील कड्याच्या टोकावरील अरुंद आणि निसरड्या रस्त्यावरुन जात असताना तिचा तोल गेला आणि ती 300 फूट खोल दरीत कोसळली. तिच्या सोबत असलेल्या मित्र-मैत्रिणींनी ही माहिती जवळील माणगांव पोलिसांना दिली. घटनेचं गांभीर्य लक्षात घेऊन माणगांवचे वरिष्ठ पोलिस निरीक्षक निवृत्ती बोराडे यांनी घटनास्थळाकडे धाव घेतली. सोबतच बचाव पथकांना पाचारण करण्यात आले. बाचावर कार्यात कुंभे ग्रामपंचायतीचे सरपंच आणि काही सदस्य तसेच कर्मचाऱ्यांनी देखील सहकार्य केलं. महावितरण कंपनीचे कर्मचारी देखील बचाव कार्यासाठी सरसावले. मात्र, कुंभे येथील दरी खूप खोल आणि अवघड असल्याचा अंदाज येताच विळे येथील शेलार मामा रेस्क्यू टीमला अखेर तातडीने बोलवण्यात आले. मात्र, संततधार पावसामुळे त्याचेही परिश्रम अपूर्ण पडले. त्यानंतर कोलाड रेस्क्यू टीमचे सागर दहींबेकर त्वरित आपल्या सहकाऱ्यांसोबत निघाले. माणगाव येथील वन्यजीव अभ्यासक शंतनु कुवेसकर यांना सदरचा कुंभे परिसर अधिक परिचयाचा असल्यामुळे संपर्क साधला.
शंतनु कुवेसकर हे देखील तातडीने आपल्या सहकाऱ्यांसोबत घटनास्थळी पोहोचले. मुलगी नेमकी कुठे कोसळली याचा अंदाज घेण्यात आला. त्यानंतर बचावकार्य सुरु कारण्यात आले. शंतनु कुवेसकर व सागर दहींबेकर त्यांचे सहकारी सुरज दहींबेकर आणि शुभंकर वनारसे अवघ्या सुरक्षा रोपच्या साहाय्याने साधारण 15 मिनिटांतच दरीत पडलेल्या मुलींपर्यंत पोहोचले. त्यानंतर महाड येथील सिस्केप रेस्क्यू टीमचे चिराग मेहता आणि ओम शिंदे वरून रॅपलिंग करत दरीमध्ये उतरले त्यामुळे बचावकार्याला अधिक गती मिळाली. मोठी कसरत करून अन्वीचा मृतदेह खोल दरीतून वर आणण्यात आला. अन्वीचा मृतदेह शवविच्छेदनासाठी पाठवण्यात आला असून तिच्या नातेवाईकांना सुपूर्द करण्यात येणार असल्याची माहिती माणगाव पोलिसांनी दिली आहे.
