शासकीय योजना तळागाळापर्यंत पोहोचवण्याचे कार्यकर्त्यांना आवाहन ; सर्किट हाऊस येथे पत्रकार परिषद, मंत्री डॉ. अशोक उईके यांची उपस्थिती
गडचिरोली : आदिवासी समाजाचा सर्वांगीण विकास आणि पक्षीय संघटनेची पाळेमुळे अधिक घट्ट करण्याच्या उद्देशाने भारतीय जनता पार्टीच्या आदिवासी मोर्चाच्या वतीने गडचिरोली येथील सर्किट हाऊस येथे एका महत्त्वपूर्ण पत्रकार परिषदेचे आयोजन करण्यात आले होते. या परिषदेत आदिवासी विकास मंत्री प्रा. अशोक उईके यांनी आदिवासी भागातील प्रलंबित प्रश्न मार्गी लावण्याचा आणि जनसंपर्क वाढवण्याचा निर्धार व्यक्त केला.
पत्रकार परिषदेत मार्गदर्शन करताना आदिवासी विकास मंत्री डॉ. अशोक उईके म्हणाले, “राज्य शासन आदिवासी बांधवांच्या उन्नतीसाठी पूर्णपणे कटिबद्ध आहे. शिक्षण, आरोग्य आणि पायाभूत सुविधांच्या बळकटीकरणासाठी अनेक योजना राबवल्या जात आहेत. या योजनांचा लाभ समाजातील शेवटच्या घटकापर्यंत पोहोचवण्यासाठी कार्यकर्त्यांनी दुवा म्हणून काम करावे आणि सक्रिय राहावे.”
यावेळी जिल्ह्यातील पक्षीय कामकाजाचा सविस्तर आढावा घेण्यात आला. आदिवासी मोर्चाचे प्रदेशाध्यक्ष डॉ. देवराव होळी यांनी संघटनात्मक बांधणीवर भर दिला. आगामी निवडणुका आणि पक्षाचे कार्यक्रम लक्षात घेता, आदिवासी समाजाशी थेट संवाद वाढवून गावोगावी पक्ष पोहोचवण्याचे लक्ष्य यावेळी निश्चित करण्यात आले.
या परिषदेला गडचिरोली विधानसभा क्षेत्राचे आमदार डॉ. मिलिंद नरोटे, भाजपा जिल्हाध्यक्ष प्रा. रमेश बारसागडे, माजी आमदार डॉ. नामदेव उसेंडी, आदिवासी मोर्चाचे जिल्हाध्यक्ष डॉ. नितीन कोडवते यांच्यासह जिल्ह्यातील प्रमुख पदाधिकारी आणि कार्यकर्ते मोठ्या संख्येने उपस्थित होते.
बैठकीत प्रामुख्याने आदिवासी क्षेत्रातील प्रलंबित विकासकामे, रोजगाराच्या संधी आणि जल-जंगल-जमीन या विषयांवरील धोरणांच्या प्रभावी अंमलबजावणीवर चर्चा करण्यात आली. आदिवासी भागात पक्षाचा जनाधार वाढवण्यासाठी विशेष संपर्क मोहीम राबवण्याचा निर्धार यावेळी सर्व मान्यवरांनी व्यक्त केला.
या पत्रकार परिषदेमुळे जिल्ह्यातील राजकीय वातावरण पुन्हा एकदा सक्रिय झाले असून, आदिवासी बहुल भागात भाजप आपली ताकद वाढवण्यासाठी सज्ज असल्याचे दिसून येत आहे.
