जिल्हाध्यक्ष प्रा. रमेश बारसागडे यांच्या उपस्थितीत चामोर्शी आणि गडचिरोली शहर मंडलाचे प्रशिक्षण पूर्ण; जिल्ह्यातील १५ मंडलांत होणार महाअभियान.
चामोर्शी : भारतीय जनता पार्टीच्या वतीने संघटन अधिक मजबूत करण्यासाठी आणि कार्यकर्त्यांना वैचारिक दिशा देण्यासाठी ‘पंडित दीनदयाळ उपाध्याय निवासी प्रशिक्षण महाअभियान २०२६’ राबविण्यात येत आहे. या अभियानांतर्गत चामोर्शी तालुक्यातील ‘विदर्भाची काशी’ असलेल्या मार्कंडा देवस्थान येथील रामप्रसाद महाराज मठ आणि गडचिरोली शहरातील आरमोरी रोडवरील आय फार्म येथे दोन दिवसीय निवासी प्रशिक्षण वर्ग मोठ्या उत्साहात संपन्न झाले.
चामोर्शी येथील शिबिराचे उद्घाटन भाजपा जिल्हाध्यक्ष प्रा. रमेश बारसागडे यांच्या हस्ते करण्यात आले. याप्रसंगी बोलताना त्यांनी कार्यकर्त्यांना ‘राष्ट्र प्रथम’ ही भावना उराशी बाळगून ‘विकसित भारत २०४७’ चा संकल्प पूर्ण करण्यासाठी सज्ज होण्याचे आवाहन केले. या दोन दिवसीय वर्गात चामोर्शी आणि गडचिरोली शहर मंडलातील कार्यकर्त्यांनी मोठ्या संख्येने सहभाग नोंदवून संघटनेबद्दल आपली बांधिलकी व्यक्त केली.
प्रशिक्षण वर्गामध्ये केवळ राजकीय नव्हे, तर रचनात्मक कार्यावरही भर देण्यात आला. यामध्ये प्रामुख्याने खालील विषयांवर तज्ज्ञ वक्त्यांनी मार्गदर्शन केले: बूथ सशक्तीकरण: बूथ स्तरावर पक्षाची पकड कशी मजबूत करावी. योजनांचा प्रचार: केंद्र व राज्य सरकारच्या लोकोपयोगी योजना शेवटच्या घटकापर्यंत कशा पोहोचवाव्यात. सोशल मीडियाचा प्रभावी वापर: डिजिटल युगात पक्षाची भूमिका लोकांपर्यंत प्रभावीपणे मांडण्याचे कौशल्य. संघटन कार्यपद्धती: आगामी राजकीय आव्हानांना सामोरे जाण्यासाठी संघटनात्मक रणनीती.
या प्रशिक्षण महाअभियानाचे नियोजन जिल्हा महामंत्री सदानंद कुथे, युवा मोर्चा अध्यक्ष मधुकर भांडेकर, माजी आमदार डॉ. नामदेवराव उसेंडी, ज्येष्ठ नेते रमेशजी भुरसे, अनिल पोहणकर, माजी मंडल अध्यक्ष आनंद भांडेकर आणि चामोर्शी मंडल अध्यक्ष रोशनी वरघंटे यांनी केले. तसेच जिल्ह्यातील ज्येष्ठ पदाधिकारी आणि बूथ स्तरावरील कार्यकर्ते मोठ्या संख्येने उपस्थित होते.
जिल्ह्यातील सर्व १५ मंडलांमध्ये अशाच प्रकारचे निवासी वर्ग आयोजित केले जाणार असून, या उपक्रमामुळे पक्ष संघटनेला नवी ऊर्जा मिळणार आहे. या शिबिरामुळे कार्यकर्त्यांमध्ये नवचैतन्य निर्माण झाले असून, ‘विकसित भारत’ या ध्येयासाठी भाजपा कार्यकर्ते आता पूर्णपणे सज्ज झाल्याचे चित्र पाहायला मिळत आहे.
