स्पर्धा, संवाद आणि समन्वयाचा त्रिवेणी संगम; पाचव्या वर्षात महोत्सवाचा उत्साह शिगेला
गडचिरोली : गोंडवाना विद्यापीठ परिसरात सध्या उत्साह, ऊर्जा आणि जल्लोषाचे अभूतपूर्व वातावरण पाहायला मिळत आहे. निमित्त आहे, विद्यापीठाच्या क्रीडा व शारीरिक शिक्षण विभागाच्या वतीने आयोजित **‘अमृत क्रीडा व कला महोत्सवा’**चे. १६ ते १८ फेब्रुवारी दरम्यान चालणाऱ्या या त्रिदिवसीय सोहळ्याने विद्यापीठ परिसर अक्षरशः न्हाऊन निघाला असून, केवळ खेळांचाच नव्हे, तर कर्मचाऱ्यांच्या सृजनशीलतेचा हा मोठा उत्सव ठरला आहे.
महोत्सवाच्या उद्घाटनानंतर दिवसभर क्रीडांगणावर विविध खेळांचा थरार अनुभवायला मिळाला. केवळ फायली आणि प्रशासकीय कामात व्यस्त राहणारे अधिकारी व कर्मचारी आज खेळाडूच्या भूमिकेत दिसले. विजयाच्या ध्येयाने धावणारी पावले, सहकाऱ्यांना प्रोत्साहन देणारा जयघोष आणि प्रत्येक सामन्यात पाहायला मिळालेली सांघिक भावना यामुळे मैदानावर एक वेगळीच रंगत आली होती.
क्रीडांगणावरील थकावट संध्याकाळी सांस्कृतिक कार्यक्रमांच्या सुरावलींनी दूर झाली. समूह आणि एकल गीत गायनातून कर्मचाऱ्यांनी आपल्या सुरेल आवाजाने रसिकांची मने जिंकली. लघुनाटिका आणि एकपात्री प्रयोगातून सामाजिक आशय, निखळ विनोद आणि भावस्पर्शी अभिनयाचा सुंदर संगम पाहायला मिळाला. दहा-पाचच्या नोकरीत दडलेली ही सुप्त प्रतिभा पाहून प्रेक्षकांनीही टाळ्यांच्या कडकडाटात दाद दिली.
विद्यापीठातील शिक्षकेत्तर कर्मचारी आणि संलग्नित अनुदानित महाविद्यालयांतील सुमारे ४५० अधिकारी व कर्मचारी या महोत्सवात सहभागी झाले आहेत. कर्मचाऱ्यांमधील ताणतणाव दूर व्हावा, त्यांच्यातील कलागुणांना व्यासपीठ मिळावे आणि परस्परांतील संवाद व ऐक्य अधिक दृढ व्हावे, या उदात्त हेतूने या महोत्सवाचे आयोजन करण्यात आले आहे.
यंदा या महोत्सवाचे पाचवे वर्ष असून, दरवर्षी सहभागाचा आकडा वाढत आहे. विद्यापीठाच्या सांस्कृतिक आणि क्रीडा परंपरेला यामुळे नवे बळ मिळत आहे. “हा महोत्सव केवळ स्पर्धा नसून, आमच्या कर्मचाऱ्यांच्या बहुआयामी व्यक्तिमत्त्वाचा सोहळा आहे,” अशी भावना आयोजकांनी व्यक्त केली. हा सोहळा शिक्षकेत्तर कर्मचाऱ्यांच्या आयुष्यातील एक अविस्मरणीय आठवण ठरणार, यात शंका नाही.
