तहसीलदारांना निवेदन; हमीभावाने (MSP) खरेदी न झाल्यास शेतकऱ्यांचे मोठे आर्थिक नुकसान होण्याची भीती.
गडचिरोली : जिल्ह्यात यंदा मका पिकाचे विक्रमी उत्पादन झाले असले तरी, योग्य बाजारभाव मिळत नसल्याने बळीराजा पुन्हा एकदा चिंतेत सापडला आहे. या पार्श्वभूमीवर, जिल्ह्यात तातडीने मका खरेदी केंद्र सुरू करून शेतकऱ्यांना हमीभावाचा (MSP) दिलासा द्यावा, अशी मागणी आम आदमी पार्टी (आप) गडचिरोली जिल्हा शाखेच्या वतीने करण्यात आली आहे. यासंदर्भात कुरखेडाचे तहसीलदार राहुल पाटील यांच्यामार्फत जिल्हाधिकाऱ्यांना मागणीचे निवेदन सादर करण्यात आले.
निवेदनात नमूद केल्याप्रमाणे, कुरखेडा तालुक्यासह संपूर्ण गडचिरोली जिल्ह्यात मका पिकाखालील क्षेत्रात मोठी वाढ झाली आहे. मात्र, ग्रामीण भागात साठवणुकीची कोणतीही सोय नसल्याने शेतकरी आपला माल एकाच वेळी बाजारात आणत आहेत. याचाच फायदा घेत व्यापारी कमी दराने मका खरेदी करत असून, हमीभावापेक्षा कमी दरात विक्री करावी लागत असल्याने शेतकऱ्यांचे आर्थिक कंबरडे मोडण्याची भीती निर्माण झाली आहे.
आम आदमी पार्टीचे जिल्हाध्यक्ष नसीर हाशमी यांनी यावेळी प्रशासनाला इशारा दिला की, “शेतकरी रात्रंदिवस मेहनत करून पीक उभे करतो, परंतु बाजारभावाअभावी त्याच्या कष्टाचे चीज होत नाही. शासनाने केवळ धान खरेदीवर लक्ष न देता, मका उत्पादकांसाठीही तातडीने केंद्रे सुरू करावीत. जर प्रशासनाने लवकर हालचाली केल्या नाहीत, तर ‘आप’ या प्रश्नावर तीव्र पाठपुरावा करेल.”
तहसीलदार राहुल पाटील यांनी ‘आप’च्या शिष्टमंडळाकडून निवेदन स्वीकारले. “शेतकऱ्यांची ही मागणी रास्त असून, संबंधित विभागाकडे तात्काळ अहवाल पाठवून मका खरेदी केंद्र सुरू करण्याबाबत आवश्यक ती कार्यवाही केली जाईल,” असे आश्वासन त्यांनी यावेळी दिले.
निवेदन सादर करतेवेळी आम आदमी पार्टीचे जिल्हा सचिव अमृत मेहेर, जिल्हा संघटक ताहीर शेख, कोषाध्यक्ष इरफान पठाण यांच्यासह शेतकरी प्रतिनिधी मनोहर झोडे, योगराज नाकाडे, सचिन झोडे, सोपान इस्कापे, मनोज परशुरामकर, माधव दहीकर आणि ज्ञानेश्वर गहाणे आदी मोठ्या संख्येने उपस्थित होते. जिल्ह्यातील मका उत्पादक आता शासनाच्या निर्णयाकडे डोळे लावून बसले असून, खरेदी केंद्र सुरू झाल्यास हजारो शेतकऱ्यांना मोठा आर्थिक आधार मिळणार आहे.
