आर.टी.ओ. आणि पोलीस विभागाचा संयुक्त उपक्रम ; ‘राहवीर’ योजनेसह विविध तांत्रिक पैलूंवर सखोल मार्गदर्शन
साकोली : वाढत्या रस्ते अपघातांच्या पार्श्वभूमीवर, तरुणांमध्ये रस्ते सुरक्षेबाबत जाणीवजागृती करण्यासाठी साकोली येथे ‘रस्ता सुरक्षा जीवन रक्षा’ मोहिमेअंतर्गत भव्य प्रबोधन कार्यक्रमाचे आयोजन करण्यात आले होते. जिल्हा रस्ता सुरक्षा समिती, परिवहन विभाग आणि पोलीस विभाग यांच्या संयुक्त विद्यमाने आयोजित या उपक्रमाला भावी अभियंते आणि औषधनिर्माणशास्त्राच्या विद्यार्थ्यांनी उत्स्फूर्त प्रतिसाद दिला.
उपप्रादेशिक परिवहन अधिकारी सतीश जाधव यांच्या मार्गदर्शनाखाली साकोलीतील बाजीराव करंजेकर कॉलेज ऑफ इंजिनिअरिंग व कॉलेज ऑफ फार्मसी या दोन महत्त्वाच्या महाविद्यालयांमध्ये हे मार्गदर्शन सत्र पार पडले. या दोन्ही सत्रांमध्ये एकूण ६०० विद्यार्थ्यांनी (प्रत्येकी ३००) उपस्थित राहून वाहतूक नियमांचे धडे गिरवले.
कार्यक्रमाचे मुख्य मार्गदर्शक शेखर आचार्य (मोटार वाहन निरीक्षक, भंडारा) यांनी विद्यार्थ्यांना रस्ते सुरक्षेच्या तांत्रिक आणि कायदेशीर पैलूंवर सविस्तर माहिती दिली. मद्यप्राशन आणि वाहन चालवणे: मद्यधुंद अवस्थेत वाहन चालवल्यामुळे होणारे जीवघेणे अपघात आणि त्याचे सामाजिक परिणाम. वेग मर्यादा (Speeding): ओव्हर स्पीडिंग आणि रॅश ड्रायव्हिंगमुळे स्वतःसोबतच इतरांचा जीव धोक्यात येत असल्याचे त्यांनी स्पष्ट केले. ‘राहवीर’ (Good Samaritan) योजना: अपघाताच्या वेळी जखमींना मदत करणाऱ्या व्यक्तीला मिळणारे कायदेशीर संरक्षण आणि प्रोत्साहन, जेणेकरून मदतीसाठी लोक पुढे येतील. शिस्त आणि नियम: हेल्मेटचा वापर, सीट बेल्ट आणि वाहतूक चिन्हांचे महत्त्व समजावून सांगितले.
“रस्त्यावरील सुरक्षा ही केवळ दंडात्मक कारवाई टाळण्यासाठी नसून, ती स्वतःच्या आणि कुटुंबाच्या जीवनाची सुरक्षा आहे. तरुणांनी केवळ वेगाच्या मागे न लागता शिस्तीने वाहन चालवावे,” असा मौलिक संदेश शेखर आचार्य यांनी यावेळी दिला.
प्रश्नोत्तरांच्या तासात विद्यार्थ्यांनी वाहतूक नियमांविषयी आपल्या शंकांचे निरसन करून घेतले. कार्यक्रमाच्या शेवटी सर्व विद्यार्थी, शिक्षक आणि प्राचार्यांनी ‘रस्ते सुरक्षेची शपथ’ घेतली. प्रशासनाच्या या उपक्रमाचे शैक्षणिक वर्तुळातून कौतुक होत असून, अशा उपक्रमांमुळे अपघातांचे प्रमाण कमी होण्यास मदत होईल, अशी अपेक्षा व्यक्त केली जात आहे.
