चंद्रपूर : मृत्यू समोर उभा ठाकला होता! शनिवारची ती रात्र, ४ ऑक्टोबर… काळोख आणि शांतता भेदून उमा नदीच्या पुलावर एक असा थरार घडला, ज्यामुळे बघणाऱ्यांच्या काळजाचा ठोका चुकला. पट्टेदार वाघाशी झालेल्या अचानकच्या भेटीत, क्षणात होत्याचे नव्हते होण्याची वेळ आलेल्या दुचाकीस्वारांनी प्रसंगावधान राखत थोडक्यात आपले प्राण वाचवले.
रात्री साधारण नऊ वाजताची वेळ. रत्नापूर-नवरगाव येथील काही नागरिक जेवणावरून शिवणीहून चारचाकी वाहनातून परतत होते. उमा नदीच्या पुलावर पोहोचताच त्यांच्या गाडीचा वेग आपोआप मंदावला, कारण रस्त्याच्या मधोमध ऐटीत एक पट्टेदार वाघ बसलेला दिसला. त्यांनी तत्काळ आपले वाहन थांबवले आणि अत्यंत सावध झाले. मात्र, त्यांच्या मागून येणाऱ्या दुचाकीस्वारांना या भयावह परिस्थितीची अजिबात कल्पना नव्हती. चारचाकीतील लोकांनी आरडाओरड करून, हातवारे करून त्यांना सावध करण्याचा आटोकाट प्रयत्न केला, पण वेळेत आवाज पोहोचला नाही. आणि दुचाकी थेट वाघाच्या अगदी जवळ, अवघ्या चार फूट अंतरावर जाऊन पोहोचली!
समोर साक्षात मृत्यू उभा असलेला पाहून दुचाकीस्वारांची अक्षरशः बोबडी वळली. वाघ देखील आता त्यांच्यावर उडी मारण्याच्या पवित्र्यात सज्ज होता. पुढचा क्षण जीवघेणा होता, पण याच वेळी त्या दुचाकीस्वारांनी प्रचंड धाडस आणि प्रसंगावधान दाखवले. त्यांनी गाडी सावरली आणि स्वतःला शांत ठेवले, ज्यामुळे हा भयानक प्रसंग थोडक्यात टळला आणि त्यांचे प्राण वाचले.
हा थरार पाहून चारचाकीतील नागरिकांनी सुटकेचा निःश्वास सोडला. यानंतर आणखी एक दुचाकी त्यांच्या मागोमाग येत होती. चारचाकीतील नागरिकांनी वेळीच त्यांना थांबवले आणि त्या सर्वांना आपल्या वाहनात घेतले. वाघाच्या जबड्यातून वाचलेल्या त्या दुचाकीस्वारांना त्यांनी अशा प्रकारे सुरक्षित स्थळी पोहोचवले.
या थरारक घटनेने चंद्रपूरच्या वनक्षेत्रात वाढलेल्या मनुष्य-वन्यजीव संघर्षाची दाहकता पुन्हा एकदा अधोरेखित केली आहे. वेळेत मदत मिळाल्याने आणि दुचाकीस्वारांनी दाखवलेल्या हिमतीमुळे मोठी दुर्घटना टळली. मात्र, जीवावर बेतलेल्या या प्रसंगातून बचावलेल्या दुचाकीस्वारांचे नाव कळू शकले नाही.
