भंडारा : राज्याचे मुख्यमंत्री तथा अर्थमंत्री देवेंद्र फडणवीस यांनी २०२६-२७ या वर्षाचा अर्थसंकल्प सादर करताना विकासाची ‘महागती’ आणि सर्वसामान्यांच्या हिताचा समतोल साधला आहे. “शेतकऱ्यांना दिलेला शब्द मुख्यमंत्र्यांनी पाळला आहे,” अशा शब्दांत विदर्भातील राजकीय वर्तुळातून या बजेटचे स्वागत होत आहे. शेतकरी कर्जमाफीची मोठी घोषणा आणि विदर्भाला सुजलाम सुफलाम करणाऱ्या वैनगंगा-नळगंगा नदी जोड प्रकल्पासाठी केलेली भरीव तरतूद, हे या अर्थसंकल्पाचे मुख्य आकर्षण ठरले आहे.
मुख्यमंत्र्यांनी शेतकरी बांधवांसाठी ‘पुण्यश्लोक अहिल्यादेवी होळकर शेतकरी कर्जमाफी योजना’ जाहीर केली आहे. या ऐतिहासिक निर्णयामुळे राज्यातील लाखो कर्जबाजारी शेतकऱ्यांना मोठा दिलासा मिळणार असून, शेती क्षेत्रातील गुंतवणुकीला नवी उभारी मिळणार आहे. “दिलेला शब्द पाळणारे मुख्यमंत्री” अशी त्यांची प्रतिमा या घोषणेमुळे अधिक गडद झाली आहे.
विदर्भाच्या सिंचनाचा अनुशेष भरून काढण्यासाठी वैनगंगा-नळगंगा नदी जोड प्रकल्पासह अन्य नदी जोड प्रकल्पांना या बजेटमध्ये मंजुरी आणि आर्थिक तरतूद देण्यात आली आहे. सिंचन क्षमता: या प्रकल्पामुळे भंडारा, नागपूर, वर्धा, यवतमाळ, अमरावती, वाशिम आणि बुलढाणा या ७ जिल्ह्यांतील सुमारे ४ लाख हेक्टर जमीन ओलिताखाली येणार आहे. वर्धा जिल्ह्याला लाभ: एकट्या वर्धा जिल्ह्यातील ६० हजार हेक्टर भूमीला याचा थेट फायदा होणार असून विदर्भ खऱ्या अर्थाने सुजलाम सुफलाम होण्याच्या दिशेने पाऊल पडले आहे.
डॉ. पंकज भोयर यांच्या पाठपुराव्याला यश आले असून, अमरावती येथे ‘डॉ. पंजाबराव देशमुख शैक्षणिक संकुल’ उभारण्याची घोषणा मुख्यमंत्र्यांनी केली आहे. विद्यार्थी विज्ञान वारी: शालेय विद्यार्थ्यांमध्ये वैज्ञानिक दृष्टिकोन आणि संशोधनवृत्ती वाढवण्यासाठी ‘मुख्यमंत्री विद्यार्थी विज्ञान वारी’ ही नवीन योजना सुरू करण्यास मान्यता देण्यात आली आहे.
अर्थसंकल्पात महिला सक्षमीकरणाचा विचार करून ‘लाडकी बहीण योजना’ अधिक प्रभावीपणे सुरू ठेवण्याचा संकल्प करण्यात आला आहे. यासोबतच: पर्यावरण: पर्यावरणाचे रक्षण करण्यासाठी ३० कोटी वृक्ष लागवडीचे उद्दिष्ट. आरोग्य: राज्यातील आरोग्य केंद्रे डिजीटल करण्यासाठी विशेष निधी. पायाभूत सुविधा: रस्ते आणि शाळांच्या अनुदानासाठी भरीव तरतूद करण्यात आली आहे. एकूणच, देवेंद्र फडणवीस यांनी मांडलेला हा अर्थसंकल्प राज्याच्या आर्थिक गतीला वेग देणारा आणि शेवटच्या घटकापर्यंत न्याय पोहोचवणारा ठरला आहे.
