भविष्यातील पिढी सुदृढ ठेवण्यासाठी १०० टक्के लसीकरणाचे उद्दिष्ट; जागतिक आरोग्य संघटनेच्या (WHO) प्रतिनिधींचे तांत्रिक मार्गदर्शन
गोंदिया : “भविष्यातील पिढी सुदृढ आणि निरोगी ठेवण्यासाठी लसीकरण हे सर्वात प्रभावी शस्त्र आहे. गोवर, पोलिओ आणि धनुर्वात यांसारख्या गंभीर आजारांपासून बालकांचे संरक्षण करण्यासाठी आरोग्य यंत्रणेने अधिक तत्परतेने कार्य करावे,” असे आवाहन जिल्हा आरोग्य अधिकारी डॉ. अभिजीत गोल्हार यांनी केले. जिल्हा परिषदेतील स्व. वसंतराव नाईक सभागृहात नुकतीच ‘लसीकरणाद्वारे टाळता येणारे आजार’ या विषयावर एक दिवसीय जिल्हास्तरीय कार्यशाळा उत्साहात पार पडली.
या कार्यशाळेत जागतिक आरोग्य संघटनेचे (WHO) प्रतिनिधी डॉ. साजीद यांनी तांत्रिक मार्गदर्शन करताना सांगितले की, विहित कालमर्यादेत बालकांचे लसीकरण केल्यास भविष्यातील अनेक गंभीर धोके टाळता येतात. नियमित लसीकरणामुळे केवळ बालमृत्यू दर कमी होत नाही, तर समाजाची आरोग्यविषयक प्रतिकारशक्तीही वाढते.
कार्यशाळेत प्रामुख्याने लसीकरणाद्वारे पूर्णपणे रोखता येणाऱ्या खालील आजारांवर लक्ष केंद्रित करण्यात आले: गोवर (Measles) व गालगुंड: लसीकरणाची व्याप्ती वाढवून प्रादुर्भाव रोखणे. पोलिओ (Polio): निर्मूलनाचे सातत्य टिकवून ठेवण्यासाठी घ्यावयाची खबरदारी. घटसर्प (Diphtheria) व डांग्या खोकला: प्राथमिक प्रतिबंधात्मक उपाययोजना. धनुर्वात (Tetanus): नवजात बालकांच्या सुरक्षिततेसाठी विशेष काळजी. इतर: हिपॅटायटिस-बी, मेंदूज्वर आणि इन्फ्लूएंझा यांसारख्या आजारांवरही मार्गदर्शन करण्यात आले.
जिल्हा आरोग्य अधिकारी डॉ. गोल्हार यांनी प्राथमिक आरोग्य केंद्रातील वैद्यकीय अधिकाऱ्यांना ग्रामीण भागात जनजागृती करण्याच्या सूचना दिल्या. लसीकरणानंतर होणाऱ्या किरकोळ प्रतिक्रिया (AEFI) जसे की, ताप किंवा इंजेक्शनच्या ठिकाणी सूज येणे, यापासून घाबरून न जाता पालकांनी बालकांना लसीकरण सत्रावर किमान अर्धा तास थांबवावे, जेणेकरून आरोग्य यंत्रणेला देखरेख करता येईल, असे आवाहनही करण्यात आले.
याप्रसंगी अतिरिक्त जिल्हा शल्य चिकित्सक डॉ. तृप्ती कटरे, सहाय्यक जिल्हा आरोग्य अधिकारी डॉ. अरविंदकुमार वाघमारे, वैद्यकीय तज्ञ डॉ. गुरूप्रकाश खोब्रागडे, जिल्हा माता व बाल संगोपन अधिकारी डॉ. रोशन राऊत, निवासी वैद्यकीय अधिकारी डॉ. भारती जयस्वाल आणि जिल्हा साथरोग अधिकारी डॉ. निरंजन अग्रवाल, जिल्हा साथरोग तज्ञ डॉ. तनया चौधरी, जिल्हा विस्तार व माध्यम अधिकारी विजय आखाडे, डॉ. गुरूप्रकाश खोब्रागडे, डॉ. भारती जयस्वाल, डॉ. तनया चौधरी आणि जिल्हा विस्तार व माध्यम अधिकारी विजय आखाडे यांच्यासह जिल्ह्यातील सर्व तालुका आरोग्य अधिकारी व वैद्यकीय अधीक्षक उपस्थित होते.
आरोग्य विभागातर्फे आवाहन करण्यात आले आहे की, आपल्या पाल्याच्या सुरक्षित भविष्यासाठी जवळच्या आरोग्य केंद्रातील वैद्यकीय अधिकारी, आरोग्य सेविका किंवा आशा सेविकांशी संपर्क साधून लसीकरण पूर्ण करून घ्यावे. वातावरणातील बदल आणि हवामान बदलामुळे उद्भवणाऱ्या आजारांना रोखण्यासाठी लसीकरण हीच काळाची गरज आहे.
