सोशल मीडियावर व्हिडिओ व्हायरल
भंडारा : “भाऊ नाही म्हणून काय झालं, आम्ही आहोत ना!” – ही भावना खऱ्या अर्थाने जपणाऱ्या भंडाऱ्यातील महिलांनी समाजाला एक मोठा संदेश दिला आहे. रस्त्यावर अचानक बंद पडलेल्या एसटी बसला धक्का देत मदतीचा हात पुढे करणाऱ्या या महिला प्रवाशांचा व्हिडिओ सध्या सोशल मीडियावर तुफान व्हायरल होत आहे.
ही घटना भंडारा जिल्ह्यातील असून, संबंधित बस नेमकी कुठून कुठे जात होती, याची माहिती मिळालेली नसली तरी, व्हिडिओतून जागा आणि प्रसंगाची गंभीरता स्पष्ट दिसून येते. प्रवासादरम्यान बस बंद पडताच महिलांनी कोणतीही वाट न पाहता पुढाकार घेतला आणि एकत्र येत बस ढकलून रस्त्याच्या कडेला लावली.
या धक्कादायक प्रसंगाचे काही प्रवाशांनी मोबाईलवर चित्रीकरण केले असून, त्यात महिला एकजुटीने “दे धक्का” मोहीम राबवताना दिसतात. काही पुरुष प्रवाशांनीही महिलांना साथ देत परिस्थितीला सामोरे जाण्याचं उत्तम उदाहरण सादर केलं.
व्हिडिओ व्हायरल झाल्यानंतर सोशल मीडियावर “हीच खरी महिला शक्ती”, “अशा बहिणींचा अभिमान वाटतो” अशा प्रतिक्रियांचा पाऊस पडत आहे. अनेकांनी या महिलांचं कौतुक करत, अशा संकटसमयी दाखवलेलं धैर्य आणि सामूहिक भावना हीच महाराष्ट्राची खरी ओळख असल्याचं म्हटलं आहे.
एसटी महामंडळाकडून अद्याप या घटनेवर अधिकृत प्रतिक्रिया आलेली नसली तरी, या महिलांनी दाखवलेली तत्परता आणि जबाबदारी निश्चितच प्रेरणादायी आहे.
