जिल्हा सामान्य रुग्णालयासह अनेक प्राथमिक आरोग्य केंद्रे व उपकेंद्रांना पुरस्कार ; मुख्य कार्यकारी अधिकारी आणि जिल्हा आरोग्य अधिकाऱ्यांकडून कौतुक
गडचिरोली : भारत सरकारने सार्वजनिक आरोग्य सेवांमध्ये गुणवत्ता आणि स्वच्छतेचे उच्चांक गाठण्यासाठी सुरू केलेल्या “कायकल्प” योजनेमुळे गडचिरोली जिल्ह्यातील आरोग्य संस्थांमध्ये लक्षणीय सुधारणा होत आहेत. या योजनेमुळे रुग्णांना चांगल्या आणि सुरक्षित वातावरणात उपचार मिळत असून, आरोग्य कर्मचाऱ्यांचेही मनोधैर्य उंचावले आहे.
“कायकल्प” योजना ही आरोग्य सुविधांमधील स्वच्छता, संक्रमण नियंत्रण, कचरा व्यवस्थापन, रुग्णसुरक्षा आणि इतर महत्त्वाच्या बाबींमध्ये सुधारणा घडवून आणण्यासाठी प्रोत्साहन देते. या योजनेअंतर्गत, आरोग्य संस्थांचे मूल्यांकन केले जाते आणि उत्कृष्ट कामगिरी करणाऱ्या संस्थांना पुरस्कार देऊन सन्मानित केले जाते. यामुळे आरोग्य संस्थांमध्ये निरोगी स्पर्धा निर्माण झाली असून, सर्वत्र सुविधांचा दर्जा सुधारण्यास मदत झाली आहे.
रुग्णालये आणि आरोग्य केंद्रांमध्ये स्वच्छतेचे उच्चांक राखणे. संक्रमण नियंत्रणासाठी प्रभावी उपाययोजना करणे. वैद्यकीय कचऱ्याची योग्य विल्हेवाट लावणे. रुग्ण सुरक्षा सुनिश्चित करणे. रुग्णालयाच्या परिसराचे सुशोभीकरण करणे. कर्मचाऱ्यांचे आरोग्य आणि स्वच्छतेबद्दलचे ज्ञान वाढवणे.
गडचिरोली जिल्ह्यामध्ये, “कायकल्प” योजनेच्या अंमलबजावणीमुळे अनेक सकारात्मक बदल दिसून आले आहेत. यामध्ये रुग्णालयांमधील स्वच्छतागृहांची सुधारित स्थिती, स्वच्छ पिण्याच्या पाण्याची उपलब्धता, ऑपरेशन थिएटरमधील निर्जंतुकीकरण प्रक्रियांचे काटेकोर पालन आणि रुग्णांसाठी अधिक मैत्रीपूर्ण वातावरण यांचा समावेश आहे. यामुळे रुग्णांचा आरोग्य सेवांवरील विश्वास वाढला असून, त्यांना दर्जेदार उपचार मिळत आहेत.
“कायकल्प योजना ही केवळ स्वच्छतेपुरती मर्यादित नाही, तर ती एक व्यापक दृष्टिकोन आहे जो सार्वजनिक आरोग्य सेवांचा चेहरामोहरा बदलत आहे. या योजनेच्या यशस्वी अंमलबजावणीसाठी आम्ही सर्व आरोग्य कर्मचारी, प्रशासन आणि स्थानिक नागरिकांचे आभार मानतो,” असे जिल्हा परिषदेचे मुख्य कार्यकारी अधिकारी सुहास गाडे यांनी सांगितले.
भविष्यातही, “कायकल्प” योजनेची प्रभावी अंमलबजावणी सुरू ठेवून, जिल्ह्यातील प्रत्येक नागरिकाला दर्जेदार आणि स्वच्छ आरोग्य सेवा उपलब्ध करून देण्यास आम्ही कटिबद्ध आहोत, असे जिल्हा आरोग्य अधिकारी डॉ. प्रताप शिंदे यांनी सांगितले.
कायाकल्प योजनेअंतर्गत दरवर्षीप्रमाणे यावर्षी सुद्धा प्राथमिक आरोग्य केंद्रे आणि उपकेंद्रांना पुरस्कार प्रदान करण्यात येणार आहे. प्रथम पुरस्कार: प्राथमिक आरोग्य केंद्र, देलनवाडी. प्रोत्साहनपर पुरस्कार: प्राथमिक आरोग्य केंद्र आरेवाडा, प्राथमिक आरोग्य केंद्र मालेवाडा, प्राथमिक आरोग्य केंद्र कुरुड, प्राथमिक आरोग्य केंद्र आलापल्ली, प्राथमिक आरोग्य केंद्र जिमलगट्टा यांना प्राप्त झालेला आहे. आरोग्य उपकेंद्रांमध्ये: उपकेंद्र वाकडी, उपकेंद्र विसोरा, उपकेंद्र घाटी यांना पुरस्कार जाहीर झाला आहे.
या सर्व प्राथमिक आरोग्य केंद्रे आणि उपकेंद्रातील वैद्यकीय अधिकारी व संपूर्ण टीमचे मनपूर्वक अभिनंदन करण्यात येत आहे. यामध्ये प्रा. केंद्र देलनवाडीचे वैद्यकीय अधिकारी डॉ. संजय सुपारे, प्रा. केंद्र मालेवाडा येथील डॉ. प्रमोद उंदीरवाडे, प्रा. केंद्र आरेवाडा येथील डॉ. सतीश तिरणकर, प्रा. केंद्र आलापल्ली येथील डॉ. उईके, प्रा. केंद्र जिमलगट्टा येथील डॉ. किरण वानखेडे, डॉ. दुर्गा जराते आणि उपकेंद्र वाकडी येथील समुदाय आरोग्य अधिकारी डॉ. स्वाती कांबळी यांचे विशेष अभिनंदन सर्व स्तरातून होत आहे.
जिल्ह्याचे कायाकल्प कार्यक्रमाचे समन्वयक डॉ. अनुपम महेशगौरी आणि जिल्हा माता व बाल संगोपन अधिकारी डॉ. प्रफुल्ल हुलके यांनी कायाकल्प कार्यक्रमाची प्रभावी अंमलबजावणी केल्याबद्दल मुख्य कार्यकारी अधिकारी सुहास गाडे आणि जिल्हा आरोग्य अधिकारी डॉ. प्रताप शिंदे यांनी त्यांचे अभिनंदन केले.
