अहेरी येथे पोलीस, मुक्तिपथ आणि पोलीस पाटलांची संयुक्त बैठक
अहेरी : तालुक्यात सुरू असलेल्या अवैध व्यवसायांवर प्रभावीपणे आळा घालण्यासाठी अहेरी पोलीस स्टेशनमध्ये पोलीस अधिकारी, मुक्तिपथ कार्यकर्ते आणि पोलीस पाटील यांची एक महत्त्वपूर्ण संयुक्त बैठक पार पडली. या बैठकीत पोलीस निरीक्षक एकरे यांनी गावातील लोकांच्या सक्रिय सहकार्याने अवैध व्यवसाय बंद करून शांतता आणि सुव्यवस्था प्रस्थापित करण्याचे आवाहन केले.
या बैठकीत पोलीस निरीक्षक एकरे यांनी पोलीस पाटलांना त्यांचे अधिकार, कार्य आणि जबाबदाऱ्या स्पष्टपणे समजावून सांगितले. तसेच, गावात सुरू असलेल्या अवैध व्यवसायांवर नियंत्रण मिळवण्यासाठी पोलीस विभागासोबत सक्रियपणे काम करण्याचे आवाहनही त्यांनी केले.
मुक्तिपथच्या तालुका संघटिका भारती उपाध्ये यांनी दारूविक्री बंदीसाठी पोलीस पाटलांनी कोणती ठोस पाऊले उचलावीत यावर मार्गदर्शन केले. त्यांनी गावागावातील अवैध दारूचे प्रमाण कमी करण्यासाठी स्थापन केलेल्या मुक्तिपथ गाव संघटनांना पाठिंबा देऊन त्यांचे मनोबल वाढवण्यावर भर दिला. जर मुजोर दारूविक्रेते ऐकत नसतील, तर तातडीने पोलीस अधिकाऱ्यांना माहिती देण्याचे आवाहनही त्यांनी केले. गावातील प्रमुख आणि सक्रिय युवक, व्यक्ती यांची मदत घेऊन अहिंसक मार्गाने कृती करण्यावर त्यांनी भर दिला. गावामध्ये शांतता राखण्यासाठी गावसभा आयोजित करणे आणि ठराव घेऊन आपल्या गावातील अवैध दारूविक्री बंद करण्यासारख्या कृतींबद्दलही त्यांनी सविस्तर माहिती दिली.
या बैठकीत एकूण ४१ गावांचे पोलीस पाटील उपस्थित होते, ज्यातून अवैध व्यवसायांविरुद्धच्या लढ्यात स्थानिक प्रशासनाचा सहभाग आणि बांधिलकी दिसून येते. या संयुक्त प्रयत्नांमुळे अहेरी तालुक्यातील अवैध व्यवसायांना आळा घालून समाजात शांतता आणि सुव्यवस्था प्रस्थापित होण्यास मदत होईल, अशी अपेक्षा व्यक्त केली जात आहे.
