अहेरी : माजी कॅबिनेट मंत्री तथा विद्यमान आमदार डॉ. राजे धर्मरावबाबा आत्राम यांच्या अध्यक्षतेखाली अहेरी येथील वासवी सेलिब्रेशन हॉल येथे पंचायत समितीची वार्षिक आमसभा उत्साहात पार पडली. स्थानिक विकास आणि नागरिकांच्या मूलभूत प्रश्नांवर लक्ष केंद्रित करत या सभेत विविध विषयांवर सखोल चर्चा करण्यात आली, ज्यामुळे आगामी वर्षातील विकासाच्या कामांना नवी दिशा मिळणार आहे.
या आमसभेला कृषी उत्पन्न बाजार समितीचे सभापती रविंद्रबाबा आत्राम, सिनेट सदस्या तनुश्री आत्राम, ज्येष्ठ नेते बबलू भैय्या हकीम, तहसीलदार बालाजी सोमवंशी, संवर्ग विकास अधिकारी चव्हाण, मुख्याधिकारी गणेश शहाणे, राष्ट्रवादी काँग्रेस पक्षाचे (अजित पवार गट) कार्यकारी जिल्हाध्यक्ष रियाज शेख, विधानसभा अध्यक्ष लक्ष्मण येर्रावार, आणि तालुका अध्यक्ष नागेश मडावी यांची उपस्थिती होती.
आमदार डॉ. धर्मरावबाबा आत्राम यांच्या मार्गदर्शनाखाली झालेल्या या बैठकीत कृषी, पाणी, शिक्षण, आरोग्य आणि पायाभूत सुविधा यासारख्या अत्यंत महत्त्वाच्या विषयांवर चर्चा झाली.
आमदार डॉ. धर्मरावबाबा आत्राम यांनी उपस्थितांना मार्गदर्शन करताना, सध्याच्या विकासकामांचा आढावा घेतला आणि आगामी वर्षासाठीच्या योजना व उद्दिष्टांवर प्रकाश टाकला. त्यांनी स्पष्ट केले की, सर्वसामान्य जनतेला केंद्रस्थानी ठेवून विकासकामे गतीने पूर्ण केली पाहिजेत. यावेळी त्यांनी प्रशासकीय यंत्रणेला कठोर निर्देश दिले की, नागरिकांच्या समस्यांचे निवारण करण्यासाठी प्रशासनाने अधिक तत्पर असावे.
स्थानिक नागरिकांना आणि लोकप्रतिनिधींना एकत्र येऊन सामूहिक निर्णय घेण्याची ही एक उत्तम संधी ठरली. या आमसभेमुळे अहेरी परिसरातील विकासाला अधिक गती मिळण्याची अपेक्षा व्यक्त केली जात आहे. सभेच्या यशस्वी आयोजनाबद्दल आयोजकांनी उपस्थितांचे आभार मानले.
