गोंदिया : जिल्हा आरोग्य अधिकारी डॉ. अभिजीत गोल्हार यांनी २९ ऑगस्ट, शुक्रवारी गोरेगाव तालुक्यातील प्राथमिक आरोग्य केंद्र आणि उपकेंद्रांना अचानक भेट देऊन तेथील कामकाजाचा सखोल आढावा घेतला. यावेळी त्यांच्यासोबत तालुका आरोग्य अधिकारी डॉ. विनोद चव्हाण उपस्थित होते. या भेटीचा मुख्य उद्देश आरोग्य सेवांची गुणवत्ता तपासणे आणि नागरिकांना मिळणाऱ्या सुविधांची खात्री करणे हा होता.
डॉ. गोल्हार यांनी सर्वात प्रथम तालुका नियंत्रण पथक कार्यालय आणि ब्लॉक आरोग्य युनिटला भेट दिली. त्यानंतर त्यांनी प्राथमिक आरोग्य केंद्र, चोपा, तसेच उपकेंद्र मुंडीपार आणि मुरदोली येथे जाऊन पाहणी केली. त्यांनी सर्व कर्मचाऱ्यांना मुख्यालयात राहून सेवा पुरवण्याचे आणि कार्यक्षेत्रातून कोणतीही तक्रार येणार नाही याची दक्षता घेण्याचे निर्देश दिले.
स्वच्छता आणि सुविधा: प्राथमिक आरोग्य केंद्रांमधील आतील व बाहेरील परिसराची नियमित स्वच्छता राखणे. प्रसूतीगृह: प्रसूतीगृहातील विविध ट्रे आणि साधनांची पाहणी करून आवश्यक सुधारणा करण्याच्या सूचना दिल्या. साथरोग नियंत्रण: पावसाळ्यात साथरोग पसरू नये यासाठी प्रतिबंधात्मक उपाययोजना तातडीने राबवा. आपत्कालीन सेवा: सर्पदंश, कुत्रादंश आणि विंचूदंश यांसारख्या आपत्कालीन घटनांसाठी नोंदणी पुस्तके (रजिस्टर) अद्ययावत ठेवणे. कार्यक्षम सेवा: सर्व कर्मचाऱ्यांनी बायोमेट्रिक हजेरी नोंदवणे, ओळखपत्र परिधान करणे आणि वेळेत दर्जेदार सेवा देणे. पोषण आणि बाल आरोग्य: कुपोषित बालकांची तपासणी करून त्यांना योग्य श्रेणीत वर्गीकृत करणे आणि आवश्यक असल्यास पोषण पुनर्वसन केंद्रात (NRC) दाखल करणे. जनजागृती: नागरिकांसाठी आरोग्यविषयक जनजागृती साहित्य अशा ठिकाणी प्रदर्शित करणे जेणेकरून ते सहज दिसेल. अशा विविध सूचना डॉ. गोल्हार यांनी दिल्या.
