माजी आ. डॉ. देवराव होळी यांची कोरची तालुक्यात पहिलीच सभा, कार्यकर्त्यांमध्ये उत्साह
गडचिरोली : भाजपच्या ‘सेवा पंधरवडा’ अभियानांतर्गत जिल्ह्यातील कोरची तालुक्यातील कोटगुल येथे माजी आमदार डॉ. देवराव होळी यांनी पहिल्यांदाच भेट दिली. त्यांच्या या भेटीमुळे स्थानिक कार्यकर्त्यांमध्ये मोठा उत्साह संचारला. या दौऱ्यात त्यांनी कार्यकर्त्यांना सामाजिक कार्य करण्यासोबतच आगामी स्थानिक स्वराज्य संस्थांच्या निवडणुकांसाठी सज्ज राहण्याचे आवाहन केले.
पंतप्रधान नरेंद्र मोदी यांच्या वाढदिवसानिमित्त देशभरात ‘सेवा पंधरवडा’ अभियान राबवले जात आहे. याअंतर्गत डॉ. होळी यांनी कोटगुल येथील कार्यक्रमात सहभाग घेतला. त्यांनी कार्यकर्त्यांना या काळात आरोग्य शिबिरे, वृक्षारोपण, आणि गावातील स्वच्छतेसारखे उपक्रम राबवून केंद्र आणि राज्य सरकारच्या जनोपयोगी योजना लोकांपर्यंत पोहोचवण्याची सूचना केली. या भेटीत त्यांनी कोटगुल येथील राजमाता देवस्थानला भेट देऊन वृक्षारोपणही केले.
या बैठकीत आगामी जिल्हा परिषद, पंचायत समिती आणि नगरपरिषद निवडणुकांवर सविस्तर चर्चा झाली. डॉ. होळी यांनी कार्यकर्त्यांना मार्गदर्शन करताना सांगितले की, येणाऱ्या स्थानिक स्वराज्य संस्थांच्या निवडणुकीत भाजप संपूर्ण ताकदीने उतरणार आहे. गडचिरोली जिल्ह्यातील सर्व १२ पंचायत समित्या, ३ नगरपरिषदा आणि जिल्हा परिषदेवर भाजपचा झेंडा फडकवण्याचा विश्वास त्यांनी व्यक्त केला. यासाठी आतापासूनच सर्व पदाधिकारी आणि कार्यकर्त्यांनी कामाला लागणे गरजेचे असल्याचे त्यांनी सांगितले.
डॉ. होळी यांच्या पहिल्याच कोरची दौऱ्यामुळे कार्यकर्त्यांमध्ये उत्साहाचे वातावरण दिसून आले. या कार्यक्रमात अनुसूचित जाती मोर्चाचे जिल्हाध्यक्ष देवराव गजभिये, भाजप तालुकाध्यक्ष सदाराम नरुटी, माजी नगराध्यक्ष नसरुद्दीन भामानी, माजी तालुकाध्यक्ष आनंद चौबे, तालुका उपाध्यक्ष प्रेमलाल उसेंडी, युवा मोर्चा तालुकाध्यक्ष विनोद कोरेटी, अनिल जनबंधु, तंटामुक्त अध्यक्ष दिलीप कोवाची, नीलकंठ जाळे, रामलाल मुलेटी, श्यामलाल राहुल, ईश्वर कोरेटी, अविनाश हारामी, सरपंच संतानु धिकोडी, उपसरपंच अनिल जनबंधू, हेमंत कुंमरे, पुरुषोत्तम कोल्हे, संतानु सोनकुकरा, शालिक शोरी, उपेंद्र बिच्छी, पवन मडावी, राजेंद्र टेंभुर्णे, गिरीजा कोरेटी, संगीता कोवाची, संगीता कोरेटी यांच्यासह अनेक पदाधिकारी व कार्यकर्ते मोठ्या संख्येने उपस्थित होते. ‘सेवा पंधरवड्या’च्या माध्यमातून समाजसेवेचा संकल्प करून भाजप गडचिरोली जिल्ह्यात आपले स्थान अधिक मजबूत करत असल्याचे यावेळी दिसून आले.
