घराच्या अंगणात बसलेल्या बालकाला बिबट्याने उचलले ; खडकी (डोंगरगाव) परिसरात दहशतीसह संतापाची लाट
गोंदिया : जिल्ह्यातील तिरोडा तालुक्यात बिबट्याची दहशत आता जीवघेणी ठरली आहे. तालुक्यातील खडकी (डोंगरगाव) येथे शुक्रवारी एका ४ वर्षीय चिमुकल्याला बिबट्याने आई-वडिलांच्या डोळ्यादेखत उचलून नेल्याची हृदयद्रावक घटना घडली. या हल्ल्यात बालकाचा मृत्यू झाला असून, या घटनेमुळे संपूर्ण जिल्ह्यात खळबळ उडाली आहे.
मृत बालकाचे नाव हियांश शिवशंकर रहांगडाले (वय ४ वर्ष) असे आहे. सविस्तर वृत्त असे की, शुक्रवारी सायंकाळच्या सुमारास हियांश आपल्या आई-वडिलांसोबत घराच्या मागील अंगणात चुलीजवळ बसलेला होता. कुटुंब गप्पा मारत असतानाच, अंधाराचा फायदा घेऊन दबा धरून बसलेल्या बिबट्याने अचानक हल्ला केला. काही कळण्याच्या आतच बिबट्याने हियांशला जबड्यात पकडून जंगलाच्या दिशेने पळ काढला.
पालकांनी आरडाओरड करत आणि जीवाच्या आकांताने बिबट्याचा पाठलाग केला, मात्र घनदाट झुडपांमुळे बिबट्या पसार झाला. घटनेची माहिती मिळताच गावकऱ्यांनी शोधमोहीम हाती घेतली, असता घरापासून काही अंतरावर हियांशचा छिन्नविछिन्न अवस्थेतील मृतदेह आढळून आला.
या घटनेनंतर खडकी आणि डोंगरगाव परिसरात तीव्र संतापाची लाट उसळली आहे. गेल्या अनेक दिवसांपासून या भागात बिबट्यांचा वावर वाढला असून, नागरिकांनी वनविभागाला (Forest Department) वारंवार सतर्क राहण्याची आणि बिबट्याचा बंदोबस्त करण्याची विनंती केली होती. मात्र, प्रशासनाकडून ठोस उपाययोजना न झाल्यामुळेच आज एका निष्पाप चिमुकल्याचा बळी गेल्याचा आरोप ग्रामस्थांनी केला आहे. नरभक्षक बिबट्याला तातडीने जेरबंद करण्यासाठी पिंजरा बसवण्यात यावा. पीडित कुटुंबाला तात्काळ जास्तीत जास्त आर्थिक मदत मिळावी. परिसरात वनविभागाचे गस्त पथक (Patrolling) २४ तास तैनात राहावे. अशी मागणी ग्रामस्थांनी केली आहे.
गोंदिया जिल्ह्यासह तिरोडा तालुक्यात वन्यजीव आणि मानवी संघर्ष टोकाला पोहोचला आहे. शेतात जाणे तर लांबच, पण आता स्वतःच्या घराच्या अंगणातही नागरिक सुरक्षित राहिलेले नाहीत. या घटनेमुळे वन यंत्रणेच्या अपयशावर बोट ठेवले जात असून, तातडीने पावले न उचलल्यास तीव्र आंदोलनाचा इशारा गावकऱ्यांनी दिला आहे.
