गडचिरोली : विद्यार्थ्यांचे आरोग्य सुदृढ राखणे आणि त्यांच्या सर्वांगीण विकासाला चालना देणे, या उद्देशाने गडचिरोली येथील गोंडवाना सैनिकी विद्यालय व उच्च माध्यमिक विद्यालय येथे विशेष आरोग्य तपासणी शिबिराचे आयोजन करण्यात आले होते. या शिबिरात इयत्ता ६ वी ते १२ वी पर्यंतच्या सर्व विद्यार्थ्यांची सविस्तर वैद्यकीय तपासणी करण्यात आली.
या शिबिरामध्ये तज्ज्ञ वैद्यकीय अधिकारी डॉ. मयुर चन्नावार, डॉ. मनिषा नागफासे तसेच सुलभा दुळसे यांनी सहभागी होऊन विद्यार्थ्यांची आरोग्य तपासणी केली. यामध्ये प्रामुख्याने विद्यार्थ्यांचे वजन, उंची, दृष्टी (Eye Check-up), दंत आरोग्य, त्वचारोग आणि सर्वसाधारण शारीरिक स्थितीची बारकाईने पाहणी करण्यात आली. ज्या विद्यार्थ्यांना आरोग्याच्या तक्रारी आढळल्या, त्यांना आवश्यक औषधोपचार आणि पुढील उपचारांसाठी तज्ज्ञ डॉक्टरांनी मोलाचा सल्ला दिला.
केवळ तपासणीच नव्हे तर विद्यार्थ्यांमध्ये आरोग्यविषयक जागरूकता निर्माण व्हावी, यासाठी डॉ. मयुर चन्नावार यांनी विशेष मार्गदर्शन केले. “स्वच्छता, संतुलित आहार, नियमित व्यायाम आणि शिस्तबद्ध जीवनशैली” ही सुदृढ आयुष्याची गुरुकिल्ली असल्याचे त्यांनी यावेळी पटवून दिले. सैनिकी शाळेतील विद्यार्थ्यांसाठी शारीरिक तंदुरुस्ती किती महत्त्वाची आहे, यावरही त्यांनी प्रकाश टाकला.
या शिबिराच्या यशस्वीतेसाठी विद्यालयाचे मुख्याध्यापक ओमप्रकाश संग्रामे, पर्यवेक्षक अजय वानखेडे, गजानन अनमुलवार, साहिल आतलामी (ब्रदर) यांच्यासह सर्व शिक्षक व शिक्षकेतर कर्मचाऱ्यांनी सक्रिय सहभाग आणि सहकार्य केले.
“विद्यार्थ्यांच्या शैक्षणिक प्रगतीसोबतच त्यांचे शारीरिक आरोग्य उत्तम असणे गरजेचे आहे. अशा आरोग्य शिबिरांमुळे विद्यार्थ्यांच्या आरोग्याकडे वेळीच लक्ष दिले जाते, ज्यामुळे त्यांच्या शैक्षणिक व क्रीडा क्षेत्रातील कामगिरीला नवी उभारी मिळते,” असे मत मुख्याध्यापक संग्रामे यांनी व्यक्त केले. शेवटी, विद्यालय प्रशासनाच्या वतीने उपस्थित वैद्यकीय पथकाचे आभार मानून शिबिराची सांगता करण्यात आली.
