गडचिरोली : जिल्ह्यातील अहेरी, आल्लापल्ली आणि नागेपल्ली परिसरात बुधवारी मध्यरात्री भूकंपाचे सौम्य धक्के जाणवले. गाढ झोपेत असताना अचानक जमिनीतून आलेल्या कंपनांमुळे नागरिकांमध्ये काही काळ भीतीचे वातावरण निर्माण झाले होते. सुदैवाने, या घटनेत कोणतीही जीवित किंवा वित्तहानी झाल्याचे वृत्त नाही.
मिळालेल्या माहितीनुसार, बुधवारी मध्यरात्री ठीक ११:४९ वाजेच्या सुमारास अहेरी शहरासह आजूबाजूच्या परिसरात जमिनीतून हलकी कंपने जाणवली. अनेक नागरिकांना घराच्या खिडक्या आणि घरातील भांडी वाजल्याचे अनुभव आले, ज्यामुळे गाढ झोपेत असलेले लोक तातडीने घराबाहेर पडले. प्राथमिक माहितीनुसार, या भूकंपाचा केंद्रबिंदू अहेरीपासून पूर्वेला साधारण ६.२ किमी अंतरावर असल्याचे सांगण्यात येत आहे.
हे धक्के जाणवले असले तरी, अद्याप अधिकृत भूकंपमापन केंद्र किंवा शासकीय यंत्रणेकडून या वृत्ताला अधिकृत दुजोरा मिळालेला नाही. भूकंपाची नेमकी तीव्रता (Magnitude) आणि जमिनीखालील खोली (Depth) याबाबतचा सविस्तर तांत्रिक अहवाल येणे अद्याप बाकी आहे. सध्या हा भूकंप ‘अप्रमाणित’ श्रेणीत ठेवण्यात आला आहे.
“नागरिकांनी घाबरून जाऊ नये. हा धक्का अत्यंत सौम्य स्वरूपाचा असल्याचे प्राथमिक स्तरावर दिसत आहे. कोणत्याही अफवांवर विश्वास ठेवू नका. आपत्कालीन परिस्थिती उद्भवल्यास तात्काळ स्थानिक प्रशासनाशी संपर्क साधावा. असे आवाहन स्थानिक प्रशासनाने केले आहे. सध्या परिसरात परिस्थिती शांत असून, जिल्हा प्रशासन आणि आपत्ती व्यवस्थापन विभाग परिस्थितीवर लक्ष ठेवून आहे. अधिकृत माहिती प्राप्त होताच सविस्तर तपशील प्रसिद्ध करण्यात येतील.
