गोंदियाचा पारा ४१ अंशांवर! उष्माघातापासून बचावासाठी जिल्हाधिकाऱ्यांचे नागरिकांना सतर्कतेचे आवाहन

शासकीय भेटींच्या वेळेत बदल; प्रत्येक आरोग्य केंद्रात स्वतंत्र ‘हिट स्ट्रोक‘ कक्ष उभारण्याचे निर्देश

गोंदिया : गोंदिया जिल्ह्यात उन्हाचा तडाखा दिवसेंदिवस वाढत असून तापमानाचा पारा ४१ अंश सेल्सिअसपर्यंत पोहोचला आहे. वाढत्या उष्णतेमुळे उष्माघाताचा धोका निर्माण झाला असून, नागरिकांनी स्वतःचा बचाव करण्यासाठी योग्य ती खबरदारी घ्यावी, असे आवाहन जिल्हाधिकारी डॉ. मंगेश गोंदावले यांनी केले आहे.

जिल्हाधिकारी कार्यालयात आयोजित ‘उष्मालाट पूर्वतयारी’ आढावा बैठकीत ते बोलत होते. या बैठकीला जिल्हा परिषदेचे मुख्य कार्यकारी अधिकारी एम. मुरुगानंथम, उपजिल्हाधिकारी मानसी पाटील, विजय अवधाने आणि जिल्हा आपत्ती व्यवस्थापन अधिकारी राजन चौबे यांच्यासह विविध विभागांचे अधिकारी उपस्थित होते.

वाढत्या उन्हाचा विचार करता जिल्हाधिकाऱ्यांनी महत्त्वपूर्ण सूचना दिल्या आहेत: भेटण्याची वेळ: शासकीय कार्यालयांत नागरिकांना भेटण्याची दुपारी २ ते ४ ही वेळ बदलून आता सकाळी १० ते ११ किंवा सायंकाळी ५ ते ६ अशी ठेवण्याच्या सूचना देण्यात आल्या आहेत. शिक्षण: शाळा आणि महाविद्यालयांच्या वेळाही सकाळी ठेवण्याचे निर्देश दिले आहेत, जेणेकरून विद्यार्थ्यांना दुपारच्या तीव्र उन्हाचा त्रास होणार नाही.

जिल्हाधिकाऱ्यांनी आरोग्य विभागाला प्रत्येक आरोग्य संस्थेत स्वतंत्र उष्माघात कक्ष (Heat Stroke Ward) स्थापन करण्याचे आदेश दिले आहेत. तसेच: प्राथमिक आरोग्य केंद्रांमध्ये ओ.आर.एस. (ORS) पावडर आणि आवश्यक औषधांचा पुरेसा साठा उपलब्ध ठेवावा. लहान मुले, वृद्ध, गरोदर स्त्रिया आणि मजूर यांसारख्या असुरक्षित घटकांसाठी विशेष वैद्यकीय लक्ष देण्यात यावे. घरांमध्ये उष्णता कमी करण्यासाठी खिडक्यांना ‘ग्रीन मॅट’ किंवा ओलसर पडद्यांचा वापर करावा.

काय करावे आणि काय टाळावे? (मार्गदर्शक सूचना)

उन्हाचा त्रास केवळ मानवांनाच नाही तर प्राण्यांनाही होतो. त्यामुळे पाळीव प्राण्यांना सावलीत आणि थंड ठिकाणी ठेवावे, तसेच त्यांना पुरेसे पिण्याचे पाणी उपलब्ध करून द्यावे, अशा सूचनाही यावेळी देण्यात आल्या.