क्रीडा विभागाच्या पुढाकारातून जिल्हा क्रीडा संकुलात आयोजन ; १०० हून अधिक नागरिक व ‘खेलो इंडिया’च्या खेळाडूंचा सहभाग
गोंदिया : जिल्हा क्रीडा अधिकारी कार्यालयाच्या पुढाकारातून जिल्हा प्रशासन, मेरा युवा भारत, भारत स्काऊट गाईड आणि विविध सामाजिक संस्थांच्या संयुक्त विद्यमाने २१ जून रोजी गोंदियात १२ वा आंतरराष्ट्रीय योग दिन मोठ्या उत्साहात आणि आरोग्यदायी वातावरणात साजरा करण्यात आला. जिल्हा क्रीडा संकुल येथे आयोजित या मुख्य सोहळ्यात शंभरहून अधिक नागरिक आणि खेलो इंडिया केंद्राच्या खेळाडूंनी सामूहिक योगासने केली. या कार्यक्रमात जलतरण तलावात घेण्यात आलेले ‘पाण्यातील योगासने’ (Water Yoga) हे यावेळच्या योग दिनाचे विशेष आकर्षण ठरले.
जिल्हा क्रीडा संकुलात सकाळी ७:३० वाजता दीपप्रज्वलनाने या सोहळ्याची सुरुवात झाली. कार्यक्रमाचे उद्घाटन इंडो-तिबेटन बॉर्डर पोलीस (ITBP) चे उपनिरीक्षक दुर्गेश वाघमारे यांच्या हस्ते करण्यात आले. याप्रसंगी प्रमुख अतिथी म्हणून तिरोडाचे गट शिक्षणाधिकारी श्री. बरीकर, सौरभ निशाद, राजू गोधेरे, शशांक कोसरकर, विनायक डोंगरवार, ॲड. पिंकी गमरे, ॲड. शैलेंद्र गडपायले, डॉ. रश्मी बोपचे, नितीन गजभिये तसेच प्रभारी जिल्हा क्रीडा अधिकारी भोजराज चौधरी आणि तालुका क्रीडा अधिकारी पूजा श्रीवास उपस्थित होते. उपस्थित मान्यवरांचा क्रीडा विभागाच्या वतीने यथोचित सन्मान करून स्वागत करण्यात आले.
मुख्य सत्रात योग प्रशिक्षक माधुरी परमार यांच्या मार्गदर्शनाखाली उद्घाटक दुर्गेश वाघमारे यांनी योगासनांची उत्कृष्ट प्रात्यक्षिके सादर केली. त्यांचे अनुकरण करत उपस्थितांनी ताडासन, वृक्षासन, पादहस्तासन, त्रिकोणासन, भुजंगासन, सेतूबंधासन आणि शवासन या आसनांचा सराव केला. यासोबतच मानसिक शांततेसाठी अनुलोम-विलोम, कपालभाती, भ्रामरी, शीतली प्राणायाम आणि ध्यानाचे (Meditation) धडेही नागरिकांनी गिरवले. यामध्ये खेलो इंडिया अंतर्गत बास्केटबॉलचे प्रशिक्षण घेणाऱ्या खेळाडूंचा सहभाग लक्षणीय होता.
नेहमीच्या योगासनांपेक्षा काहीतरी वेगळे करत यावर्षी जिल्हा क्रीडा संकुलाच्या जलतरण तलावात स्वप्नील यादव यांच्या मार्गदर्शनाखाली पाण्यात योगाभ्यासाचे विशेष सत्र आयोजित करण्यात आले होते. या आगळ्यावेगळ्या ‘वॉटर योगा’ सत्रात स्थानिक जलतरणपटूंनी अत्यंत उत्साहाने भाग घेत पाण्यात विविध अवघड योगासने सादर केली, ज्याची उपस्थितांनी विशेष दाद घेतली.
कार्यक्रमाचे अभ्यासपूर्ण प्रास्ताविक प्रभारी जिल्हा क्रीडा अधिकारी भोजराज चौधरी यांनी केले. सुबक संचालन पराग खुजे यांनी केले, तर शेवटी उपस्थितांचे आभार रितेश पाखमोडे यांनी मानले. हा सोहळा यशस्वी करण्यासाठी किसन गावड, नरेंद्र कोचे, शिवचरण चौधरी, शेखर बिरणवार यांच्यासह क्रीडा विभागाचे इतर कर्मचारी आणि विद्यार्थ्यांनी अथक परिश्रम घेतले. क्रीडा विभागाच्या या कौतुकास्पद उपक्रमामुळे गोंदियाकरांमध्ये योगाबद्दल अधिक जागरूकता निर्माण होऊन आरोग्याचा सकारात्मक संदेश पोहोचला आहे.
