वडसा मार्गावरील विद्यानगर परिसरातील घटना ; चालक बालंबाल बचावला
कुरखेडा : शहरातील वडसा मार्गावरील विद्यानगर परिसरात असलेल्या पुलावर रविवारी (दि. ५) सिमेंटचे खांब घेऊन जाणाऱ्या एका ट्रॅक्टरचा भीषण अपघात झाला. ट्रॅक्टरचे नियंत्रण सुटल्याने इंजिन नाल्यावरील पुलाच्या खाली कोसळले, तर सिमेंटच्या खांबांनी भरलेली ट्रॉली पुलाच्या कडेला धोकादायक स्थितीत लटकली. सुदैवाने, या गंभीर अपघातात चालक उमेश कोरिटी (रा. चरविदंड) हा बालंबाल बचावला आहे.
प्राप्त माहितीनुसार, चालक उमेश कोरिटी हे ट्रॅक्टरमधून सिमेंट रस्त्याच्या कामाचे साहित्य घेऊन सावंगी येथे जात होते. दरम्यान, कुरखेड्यातील विद्यानगर परिसरातील नाल्याच्या पुलावरून जात असताना अचानक ट्रॅक्टरवरील ताबा सुटल्याने हा अपघात घडला. अपघाताची तीव्रता इतकी भीषण होती की, ट्रॅक्टरचे इंजिन थेट पुलाखाली कोसळले. ट्रॉली पुलाच्या कडेला अडकून राहिल्याने मोठा अनर्थ टळला. या घटनेनंतर परिसरात एकच खळबळ उडाली होती.
अपघाताची माहिती मिळताच परिसरातील नागरिकांनी घटनास्थळी धाव घेतली आणि जखमी चालकाला तातडीने उपचारासाठी जवळच्या रुग्णालयात दाखल केले. या अपघातामुळे वडसा मार्गावरील वाहतूक काही काळासाठी विस्कळीत झाली होती. कुरखेडा पोलिसांनी तातडीने घटनास्थळी पोहोचून पंचनामा केला असून, अपघाताचे नेमके कारण शोधण्याचे काम सुरू आहे.
ट्रॅक्टरमध्ये जड सिमेंट खांब असल्याने अपघाताचे गांभीर्य अधिक वाढले होते. सुदैवाने कोणतीही जीवितहानी झाली नाही, परंतु या मार्गावर वारंवार होणाऱ्या अपघातांमुळे नागरिक आता धास्तावले आहेत. धोकादायक वळणे आणि पुलांच्या ठिकाणी आवश्यक सुरक्षा उपाययोजना कराव्यात, तसेच वाहनचालकांनी वेगावर नियंत्रण ठेवून वाहतुकीच्या नियमांचे काटेकोर पालन करावे, अशी मागणी स्थानिक नागरिकांनी प्रशासनाकडे केली आहे.
