आरोग्य विभाग आणि युनिसेफचा संयुक्त उपक्रम ; बापू कुटीच्या सानिध्यात साधला विद्यार्थ्यांशी संवाद
गोंदिया : वर्धा येथील सेवाग्राम स्थित ‘बापू कुटी’च्या ऐतिहासिक परिसरात आयोजित विभागीय किशोर सशक्तीकरण संवाद कार्यशाळेत गोंदियाच्या श्री महावीर मारवाडी हायस्कूलच्या विद्यार्थिनींनी आपल्या ज्ञानाने आणि कौशल्याने सर्वांचे लक्ष वेधून घेतले. आरोग्य व कुटुंब कल्याण प्रशिक्षण केंद्र, नागपूर आणि युनिसेफ (UNICEF) यांच्या संयुक्त विद्यमाने या कार्यशाळेचे आयोजन करण्यात आले होते.
अंजू उप्पल व डॉ. संदीप सांगले (आरोग्य विभाग, मुंबई), डॉ. शशिकांत शंभरकर (उपसंचालक, नागपूर विभाग) यांनी या कार्यशाळेत विद्यार्थ्यांना मार्गदर्शन केले. या तज्ज्ञांनी किशोरवयीन मुलांचे आरोग्य, मानसिक सक्षमीकरण आणि सामाजिक बदलांमधील त्यांची भूमिका यावर सविस्तर प्रकाश टाकला.
मुख्याध्यापक अजय शामका यांच्या मार्गदर्शनाखाली शाळेतील इयत्ता ९ वी आणि १० वीच्या एकूण १० विद्यार्थिनी या कार्यशाळेत सहभागी झाल्या होत्या. त्यांच्यासोबत प्रभारी शिक्षक प्रशांत वासनिक व सनी भादुपोते उपस्थित होते. गोंदियाच्या आरोग्य पथकातील जिल्हा शल्यचिकित्सक डॉ. पुरुषोत्तम पटले, जिल्हा आरोग्य अधिकारी डॉ. अभिजित गोल्हार यांच्यासह संपूर्ण टीमने या सहभागासाठी विशेष पुढाकार घेतला होता.
कार्यशाळेसोबतच विद्यार्थ्यांसाठी एका विशेष शैक्षणिक सहलीचेही आयोजन करण्यात आले होते. बापूंची झोपडी: सेवाग्राम आश्रमातील महात्मा गांधींच्या झोपडीला भेट देऊन विद्यार्थ्यांनी राष्ट्रपित्याच्या जीवन प्रवासाची आणि ऐतिहासिक घटनांची माहिती घेतली. उपक्रम: संवादात्मक सत्रे, गटचर्चा आणि शैक्षणिक खेळांच्या माध्यमातून विद्यार्थ्यांच्या व्यक्तिमत्त्व विकासावर भर देण्यात आला.
या यशस्वी सहभागाबद्दल संस्थेचे अध्यक्ष सीताराम अग्रवाल आणि सचिव प्रकाशचंदजी कोठारी यांनी विद्यार्थ्यांचे अभिनंदन केले. “अशा उपक्रमांमुळे विद्यार्थ्यांमध्ये आरोग्य जागृती निर्माण होऊन त्यांच्या भविष्याला नवी दिशा मिळते,” अशा शब्दांत त्यांनी आपला आनंद व्यक्त केला.
या उपक्रमाच्या यशस्वीतेसाठी डॉ. नितीन कापसे, डॉ. रोशन राऊत, सपना ठाकरे, डॉ. संदीप आणि आशा सेविका बबिता मेश्राम यांनी अथक परिश्रम घेतले. ही कार्यशाळा किशोरवयीन मुलांच्या सर्वांगीण विकासासाठी एक महत्त्वाचा मैलाचा दगड ठरली आहे.
