गडचिरोली : शहरातील सर्वोदय वार्डातील गुजरी परिसरात असलेल्या एका घरी धाड टाकून 5 हजार 520 रुपयांची देशी दारू जप्त केल्याची कारवाई गडचिरोली पोलीस व मुक्तिपथ तालुका चमूने संयुक्तरित्या केली आहे. याप्रकरणी अनुप कत्रोजवार या विक्रेत्यावर गुन्हा दाखल करण्यात आला.
गडचिरोली शहरात शांतता व सुव्यवस्था राखण्यासाठी दारू विक्रेत्यांवर पोलीस विभागातर्फे पाळत ठेवून कारवाई केली जात आहे. शहरातील विक्रेत्यांविरोधात मोहीम सुरु असून विविध वार्डातील विक्रेत्यांवर कारवाई करीत गुन्हा दाखल करण्यात आला आहे. शहरातील गुजरी परिसरात एक व्यक्ती दारूविक्री करीत असल्याची गुप्त माहिती मिळाली. प्राप्त माहितीच्या आधारे गडचिरोली पोलीस व मुक्तिपथ तालुका चमूने संबंधित विक्रेत्याच्या घरावर धाड टाकून तपासणी केली असता, 5 हजार 520 रुपयांची देशी दारू मिळून आली. पोलिसांनी पंचनामा करून अनुप कत्रोजवार याच्यावर गुन्हा दाखल केला आहे. या कारवाईमुळे शहरातील इतर विक्रेत्यांमध्ये खळबळ निर्माण झाली आहे.
सदर कारवाई पोलीस निरीक्षक विनोद चव्हाण यांचे मार्गदर्शनखाली पोलिस कर्मचारी राजेंद्र पुरी, विरा उईके, अर्पण कलिये यांनी केली. यावेळी मुक्तिपथचे संघटक रेवनाथ मेश्राम, मेघा गोवर्धन तालुका प्रेरक, पल्लवी पेटकर उपस्थित होते.
