“मलेरियामुक्त गडचिरोली”साठी प्रशासकीय कंबर कसली ; जागतिक मलेरिया दिनानिमित्त जनजागृती रॅली व उत्कृष्ट कर्मचाऱ्यांचा गौरव
गडचिरोली : जिल्ह्याची जंगलयुक्त आणि दुर्गम भौगोलिक परिस्थिती मलेरियासाठी संवेदनशील मानली जाते. विशेषतः पावसाळ्यात हा धोका अधिक वाढतो. ही बाब लक्षात घेऊन पावसाळ्यापूर्वीच (प्री-मान्सून) प्रतिबंधात्मक उपाययोजना अधिक प्रभावीपणे राबवा, असे निर्देश जिल्हा परिषदेचे मुख्य कार्यकारी अधिकारी सुहास गाडे यांनी दिले. जागतिक मलेरिया दिनानिमित्त जिल्हा परिषद गडचिरोली येथे आयोजित व्यापक जनजागृती व आढावा कार्यक्रमात ते बोलत होते.
मार्गदर्शन करताना सीईओ सुहास गाडे म्हणाले, “मलेरिया नियंत्रणात यंदा सकारात्मक घट दिसून येत असली तरी, दुर्गम भागातील आव्हाने लक्षात घेता आपल्याला अधिक सतर्क राहावे लागेल. ‘Test, Treat, Track’ (तपासणी, उपचार आणि मागोवा) या त्रिसूत्रीचा वापर करून प्रत्येक संशयित रुग्णापर्यंत आरोग्य सेवा पोहोचवणे अनिवार्य आहे.” ग्रामीण स्तरावर कार्यरत आरोग्य कर्मचाऱ्यांनी या मोहिमेत पुढाकार घेण्याचे आवाहन त्यांनी यावेळी केले.
कार्यक्रमादरम्यान आरोग्य तज्ज्ञांनी नागरिकांना खालील प्रतिबंधात्मक उपाययोजनांचे पालन करण्याचे आवाहन केले: पाणी साचू देऊ नका: घराच्या परिसरात पाणी साचणार नाही याची दक्षता घ्यावी. मच्छरदाणीचा वापर: कीटकनाशकयुक्त मच्छरदाणी (LLIN) नियमितपणे वापरावी. स्वच्छता: कीटकनाशक फवारणी व धूर फवारणी मोहिमेत सहकार्य करावे. त्वरित तपासणी: ताप आल्यास अंगावर न काढता त्वरित रक्त तपासणी करून औषधोपचार घ्यावेत.
मलेरिया नियंत्रणाच्या कार्यात उल्लेखनीय कामगिरी करणाऱ्या आरोग्य कर्मचाऱ्यांचा मान्यवरांच्या हस्ते प्रशस्तीपत्र देऊन गौरव करण्यात आला. यावेळी नर्सिंगच्या विद्यार्थ्यांनी काढलेल्या जनजागृती रॅलीने शहराचे लक्ष वेधून घेतले. “मलेरिया टाळा – जीवन वाचवा” आणि “स्वच्छ परिसर, निरोगी जीवन” अशा घोषणांनी परिसर दुमदुमून गेला होता.
या कार्यक्रमाला जिल्हा आरोग्य अधिकारी डॉ. प्रताप शिंदे, डॉ. माधुरी किलनाके (अधीक्षिका, महिला व बाल रुग्णालय), निवासी वैद्यकीय अधिकारी डॉ. अमरेश तिवारी, डॉ. छाया उईके, जिल्हा हिवताप अधिकारी डॉ. सुजाता वाढीवे आणि व्हीबीडीसी सल्लागार राजेश कार्लेकर यांच्यासह आरोग्य विभागाचे अधिकारी व कर्मचारी मोठ्या संख्येने उपस्थित होते.
“मलेरियामुक्त गडचिरोली” हे स्वप्न साकार करण्यासाठी प्रत्येक नागरिकाने आरोग्य कर्मचाऱ्यांना सहकार्य करून आपल्या परिसरात स्वच्छता राखावी, असे कळकळीचे आवाहन प्रशासनातर्फे करण्यात आले आहे.
