भंडारा : मामाच्या घरगुती वादाची तक्रार देण्यासाठी मामीसोबत पोलीस ठाण्यात गेलेल्या एका २६ वर्षीय तरुणावर परत येताना काळाने झडप घातली आहे. पोलीस ठाण्यातील प्रक्रिया पूर्ण करून मामीला दुचाकीने घरी सोडण्यासाठी निघालेल्या या तरुणाचा एसटी बसच्या मागच्या चाकाखाली आल्याने जागीच चिरडून अत्यंत हृदयद्रावक मृत्यू झाला. ही घटना सोमवार, १ जून रोजी सकाळी १०:३० वाजताच्या सुमारास मोहाडी-तुमसर राज्य मार्गावरील ग्रामीण रुग्णालयाजवळ घडली. आकाश प्रकाश कटबर्ये (वय २६ वर्षे, रा. हरदोली) असे मृत पावलेल्या दुर्दैवी तरुणाचे नाव आहे. या अपघातात त्याची मामी अनिता मनोज कुर्वे (वय ४० वर्षे) या गंभीर जखमी झाल्या असून हरदोली गावावर या घटनेमुळे एकाएकी शोककळा पसरली आहे.
प्राप्त माहितीनुसार, मृत आकाश कटबर्ये हा आपल्या मामाच्या घरातील कौटुंबिक वादाची अधिकृत तक्रार नोंदवण्यासाठी मामी अनिता कुर्वे यांच्यासह मोहाडी पोलीस ठाण्यात आला होता. पोलीस ठाण्यातील कायदेशीर तक्रार प्रक्रिया पूर्ण करून दोघेही आपल्या दुचाकीने (क्रमांक एम एच ३६ एझेड ०६२८) मूळ गाव हरदोलीकडे जाण्यास निघाले. त्यांची दुचाकी मोहाडी येथील ग्रामीण रुग्णालयाच्या समोरून जात असताना, मागून येणाऱ्या एका अज्ञात भरधाव दुचाकीस्वाराने आकाशच्या दुचाकीला जोरात ‘कट’ मारला. हा कट इतका अचानक आणि धोकादायक होता की, आकाशचे दुचाकीवरील नियंत्रण पूर्णपणे सुटले. संतुलन बिघडल्याने मामी अनिता कुर्वे या रस्त्याच्या एका बाजूला फेकल्या गेल्या. मात्र, दुर्दैवाने आकाश थेट समोरून येणाऱ्या तुमसर-नागपूर मार्गावरील ‘हिरकणी’ एसटी बसच्या (क्रमांक एम एच ०६ बी डब्ल्यू १४३) मागच्या चाकाखाली आला आणि बसचे जड चाक त्याच्या अंगावरून गेले.
अपघात घडला त्याच वेळी पोलीस जीपचे चालक पृथ्वीराज राठोड हे तिथून जात होते. त्यांनी प्रसंगानुरूप कमालीची तत्परता दाखवत स्थानिक नागरिकांच्या मदतीने रक्ताच्या थारोळ्यात पडलेल्या आकाशला आणि जखमी अनिता यांना तातडीने रुग्णालयात हलवले. मात्र, डॉक्टरांनी तपासणीअंती आकाशला उपचारापूर्वीच मृत घोषित केले. मामी अनिता कुर्वे यांच्या डोक्याला आणि शरीराला गंभीर दुखापत झाल्यामुळे त्यांना पुढील तातडीच्या उपचारासाठी भंडारा येथील जिल्हा शासकीय रुग्णालयात दाखल करण्यात आले आहे.
घटनेची भीषणता पाहून परिसरात नागरिकांची मोठी गर्दी जमली होती. अपघाताची माहिती मिळताच मोहाडीचे पोलीस निरीक्षक सुरेंद्र बेलखेडे यांच्या नेतृत्वात पोलीस पथक घटनास्थळी दाखल झाले. पोलीस हवालदार दुर्योधन भुरे, लांजेवार, कल्पना फड आणि ज्योत्सना बानासुरे यांनी अत्यंत संयमाने जमाव नियंत्रित करून वाहतूक सुरळीत केली आणि परिस्थिती हाताळली.
मोहाडी तालुक्यातून जाणाऱ्या मुख्य महामार्गांवर गेल्या काही दिवसांत अपघातांचे सत्र कमालीचे वाढले आहे. भरधाव वाहने आणि बेशिस्तपणे ओव्हरटेक करणाऱ्या वाहनधारकांमुळे निष्पाप नागरिकांचे नाहक बळी जात असल्याने मोहाडी परिसरातील नागरिकांमध्ये तीव्र संताप व दहशतीचे वातावरण निर्माण झाले आहे. या अपघाताचा पुढील सखोल तपास मोहाडी पोलीस करत आहेत.
