ओडिशातून नागपूरकडे चालली होती अमली पदार्थांची मोठी तस्करी
भंडारा : राष्ट्रीय महामार्गावरील सेंदूरवाफा टोलनाका येथे मुंबईच्या अमली पदार्थ (नार्कोटिक्स) विरोधी पथक आणि साकोली पोलिसांनी संयुक्तपणे एक धाडसी मोहीम राबवून तब्बल २४५ किलो गांजा जप्त केला आहे. ओडिशातून नागपूरकडे एका आयशर ट्रकमधून अत्यंत चतुराईने तस्करीसाठी नेला जाणारा हा अमली पदार्थांचा मोठा साठा जप्त करण्यात आला असून, या प्रकरणी नागपूर आणि अमरावती येथील दोघांना ताब्यात घेण्यात आले आहे. या धडक कारवाईमुळे आंतरराज्यीय अमली पदार्थ तस्करांच्या रॅकेटला मोठा हादरा बसला आहे.
मुंबईच्या अमली पदार्थ विरोधी पथकाला गोपनीय सूत्रांकडून खात्रीलायक माहिती मिळाली होती की, ओडिशातील संबलपूर येथून नागपूरच्या दिशेने एका आयशर ट्रकमधून (क्रमांक: MH-40-CD-4548) मोठ्या प्रमाणावर गांजाची वाहतूक केली जात आहे. या माहितीच्या आधारे नार्कोटिक्स विभागाचे अधिकारी सतीश ठाणेदार महादेव आचरेकर यांच्या नेतृत्वाखालील पथकाने साकोली पोलिसांशी संपर्क साधून राष्ट्रीय महामार्गावरील सेंदूरवाफा टोलनाक्यावर कडेकोट नाकेबंदी करत सापळा रचला.
मंगळवार, ३० जून रोजी सकाळी सुमारे १०:३० वाजताच्या सुमारास संशयित आयशर ट्रक टोलनाक्यावर पोहोचला. पोलिसांनी तात्काळ ट्रकला वेढा घालून त्याची कसून तपासणी सुरू केली. वरवर पाहता ट्रकमध्ये केवळ कॅरेट दिसत होते, मात्र पोलिसांनी अधिक तपास केला असता, त्या कॅरेटच्या खाली अत्यंत हुशारीने लपवून ठेवलेला २४५ किलो गांजाचा साठा आढळून आला. पोलिसांनी अमली पदार्थांसह आयशर ट्रक तात्काळ जप्त केला. या आंतरराज्यीय तस्करीप्रकरणी पोलिसांनी कमलेश किरणसिंग बघेल (वय ४२, चालक) – रा. रामेश्वरी, नागपूर. प्रशांत श्रावण धुर्वे (वय २२, क्लीनर) – रा. हातुरणा, ता. वरुड, जि. अमरावती. यांना रंगेहात अटक केली आहे.
जप्त केलेला गांजा, आयशर वाहन आणि दोन्ही आरोपींना सध्या नार्कोटिक्स विभागाने आपल्या ताब्यात घेतले आहे. हा गांजा ओडिशातून कोणी पाठवला होता, नागपूरमध्ये तो कोणाला दिला जाणार होता, आणि या अमली पदार्थ तस्करीमागील मुख्य सूत्रधार (किंगपिन) कोण आहे, याचा शोध घेण्यासाठी नार्कोटिक्स विभागाचे पथक पुढील सखोल तपास करत आहे.
