स्वातंत्र्यदिनाच्या पूर्वसंध्येला ३ गरोदर महिलांवर यशस्वी शस्त्रक्रिया; गडचिरोली अन् कुरखेडाचा फेरा टळला!
कोरची ग्रामीण रुग्णालयात पहिल्यांदाच तीन यशस्वी सिझेरियन; दुर्गम भागातील गर्भवतींना मोठा दिलासा
कोरची ,दि. १४ ऑगस्ट : अतिदुर्गम व आदिवासी बहुल कोरची तालुक्याच्या आरोग्य क्षेत्रात स्वातंत्र्यदिनाच्या पूर्वसंध्येला एक अत्यंत महत्त्वाची आणि ऐतिहासिक घटना घडली आहे. कोरची येथील ग्रामीण रुग्णालयात पहिल्यांदाच तीन गरोदर महिलांवर अत्यंत यशस्वी ‘सिझेरियन’ (सिझर) शस्त्रक्रिया करण्यात आल्या. या ऐतिहासिक कामगिरीमुळे दुर्गम भागातील मातांवर स्थानिक पातळीवरच सुरक्षित प्रसूतीचा मार्ग मोकळा झाला असून, नागरिकांमधून अत्यंत समाधान व्यक्त केले जात आहे.
यापूर्वी कोरची तालुक्यातील गुंतागुंतीच्या किंवा अतिजोखमीच्या गर्भवती महिलांना सिझेरियन प्रसूतीसाठी जिल्हा महिला व बाल रुग्णालय (गडचिरोली) किंवा उपजिल्हा रुग्णालय (कुरखेडा) येथे तातडीने रेफर करावे लागत होते. यामुळे रुग्ण व त्यांच्या नातेवाईकांना लांबचा प्रवास, वेळेचा अपव्यय आणि मोठ्या आर्थिक झळा सोसाव्या लागत होत्या. मात्र, आता कोरची ग्रामीण रुग्णालयातच ही जीवनदायी सुविधा सुरू झाल्याने दुर्गम भागातील महिलांना स्थानिक पातळीवरच वेळेत व मोफत उपचार मिळणे शक्य झाले आहे.
ही ऐतिहासिक शस्त्रक्रिया जिल्हा शल्यचिकित्सक तथा स्त्रीरोगतज्ज्ञ डॉ. वर्षा लहाडे यांच्या मार्गदर्शनाखाली पार पडली. त्यांच्या पुढाकाराने ग्रामीण रुग्णालयाचे वैद्यकीय अधीक्षक डॉ. कमलेश पारसवाणी यांनी आवश्यक वैद्यकीय यंत्रणा, मनुष्यबळ आणि समन्वय साधून ही सेवा प्रत्यक्षात सुरू केली. या मोहिमेत स्त्रीरोगतज्ज्ञ डॉ. नंदकुमार माळकोळीकर, तालुका आरोग्य अधिकारी डॉ. विनोद मडावी, बालरोगतज्ज्ञ डॉ. प्रवीण इरपाते, भूलतज्ज्ञ डॉ. समीर बनसोडे तसेच रुग्णालयातील डॉक्टर, परिचारिका व कर्मचाऱ्यांनी मोलाचे योगदान दिले. या शस्त्रक्रियेत तिन्ही मातांनी सुरक्षितपणे बाळांना जन्म दिला असून, सध्या तिन्ही नवजात बालके व मातांची प्रकृती अत्यंत उत्तम आहे.
स्वातंत्र्यदिनाच्या पार्श्वभूमीवर कोरचीसारख्या दुर्गम भागात ही अत्याधुनिक वैद्यकीय सेवा उपलब्ध होणे हा आरोग्य यंत्रणेचा एक मोठा टप्पा मानला जात आहे. भविष्यातही ही सिझेरियन प्रसूती सेवा अशीच नियमितपणे सुरू राहावी, अशी रास्त अपेक्षा तालुक्यातील नागरिकांनी व्यक्त केली आहे.
